Քաղաքականություն
22.05.2026 | 20:15
Հայաստանի բնակչության շրջանում պետական և հասարակական ինստիտուտների նկատմամբ վստահության պատկերը փոփոխվել է։ Ամենաբարձր վստահությունը շարունակում է վայելել ԶՈՒ-ը (լիովին գոհ է 49%-ը, ավելի շուտ գոհ է 28%-ը), իսկ ամենացածր գնահատականները ստացել է դատական համակարգը (լիովին գոհ է 13%-ը, ավելի շուտ գոհ է 31%-ը)։ Տվյալներն ամփոփված են Միջազգային հանրապետական ինստիտուտի (IRI) հետազոտության մեջ։
Հետաքրքիր է, որ Հայաստանում վստահության ամենաբարձր մակարդակն ունեցող կառույցների եռյակն այս անգամ այլ պատկեր ունի։ Եթե 2026-ի փետրվարի տվյալներով Հայ առաքելական եկեղեցին երկրորդն էր այս ցանկում, ապա հիմա հինգերոդ տեղում է․ համեմատաբար բարձր ցուցանիշ են գրանցել մարզպետարանները, ոստիկանությունը և ՏԻՄ-ները։
Միաժամանակ եկեղեցու նկատմամբ հանրային գոհունակությունը 2026 թվականի փետրվարից մինչև մայիս աճել է 6 տոկոսային կետով։ Եկեղեցու գործունեությունից լիովին գոհ է հարցվածների 40%-ը և ավելի շուտ գոհ է 27%-ը։
Տվյալները նաև ցույց են տալիս, որ վերջին տարիներին եկեղեցու նկատմամբ հանրային վերաբերմունքը փոփոխական է եղել։ Եթե 2019 թվականի հոկտեմբերին եկեղեցու աշխատանքից գոհ էր հարցվածների 74%-ը, ապա 2024 թվականի սեպտեմբերին այդ ցուցանիշը նվազել էր մինչև 48%։ Դրանից հետո արձանագրվել է վստահության աճ։
Երկրորդ տեղում են մարզպետարանները՝ 72% (լիովին գոհ է և ավելի շատ գոհ է միասին), ապա՝ ՆԳՆ-ն և տեղական ինքնակառավարման մարմինները՝ համապատասխանաբար 69% և 68%։ Փետրվարի համեմատ այս երեք ինստիտուտները բարելավել են իրենց դիրքերը հետազոտության սանդղակում։
Հետազոտությունն իրականացվել է 2026 թվականի մայիսի 5-11-ը՝ հեռախոսային հարցազրույցների միջոցով։ Հարցմանը մասնակցել է Հայաստանի 1,511 մշտական բնակիչ։
Նկարը մշակված է արհեստական բանականության օգնությամբ։
Անի Թամրազյան
