Դեսպան Նարեկ Մկրտչյանը ԱՄՆ Կոնգրեսում մասնակցել է ընտանիքների բարօրությանը նվիրված միջոցառման

ԱՄՆ-ում ՀՀ դեսպան Նարեկ Մկրտչյանը Կոնգրեսում որպես հատուկ հյուր մասնակցել է Family Focused Treatment Association-ի միջոցառմանը, որի ընթացքում քննարկվել են երեխաների և ընտանիքների բարեկեցության ապահովման, խնամատարության ինստիտուտի զարգացման և համայնքային ու պետական մակարդակներում դրա առաջխաղացման հարցեր։ Միջոցառման շրջանակում անդրադարձ է եղել նաև խնամատարության ինստիտուտի զարգացման ուղղությամբ Հայաստանի վարած քաղաքականությանը։

«Դեսպան Նարեկ Մկրտչյանն ԱՄՆ Կոնգրեսում որպես հատուկ հյուր մասնակցել է Family Focused Treatment Association (FFTA) կազմակերպության «Քաղաքականության կիրարկում՝ ի նպաստ ընտանիքների բարօրության» միջոցառմանը, որի շրջանակում հանդիպում է ունեցել միջոցառման համակազմակերպիչ, FFTA-ի Հանրային քաղաքականության և նահանգային գործընկերությունների տնօրեն Տրևա Ջոնսոնի և ԱՄՆ Բնակարանաշինության և քաղաքային զարգացման քարտուղարության Հյուսիսարևմտյան տարածաշրջանի ադմինիստրատոր Քրիս Պատերսոնի հետ։

Ընդգծվել է երեխաների և ընտանիքների բարեկեցության ապահովման, համայնքային և պետական մակարդակներում խնամատարության ինստիտուտի առաջխաղացման կարևորությունը։ Անդրադարձ է արվել նաև ինստիտուտի զարգացման ուղղությամբ ՀՀ վարած քաղաքականությանը։

Կայացած միջոցառման շրջանակում FFTA Հանրային քաղաքականության ինստիտուտը համախմբել է պետական կառույցների ներկայացուցիչների, քաղաքականություն մշակողների, փորձագետների և անհատների, ովքեր դիտարկել են խնամատարության ինստիտուտի զարգացման հեռանկարները, սահմանված առաջնահերթություններն ու դրանց գործնական իրականցման հնարավորությունները»,- ասված է հաղորդագրությունում։