Էրդողանն ու Մակրոնը բանակցում են ՀՕՊ-ի վերաբերյալ խոշոր գործարքի շուրջ

Թուրքիայի նախագահ Ռեջեփ Թայիփ Էրդողանը և Ֆրանսիայի նախագահ Էմանուել Մակրոնը բանակցություններ են վարում հակաօդային պաշտպանության խոշոր գործարքի շուրջ, որը կարող է ճանապարհ հարթել Թուրքիայի համար՝ գնելու և համատեղ արտադրելու ֆրանս-իտալական SAMP/T Mamba հակահրթիռային պաշտպանության համակարգը, հաղորդում է Intelligence Online-ը։ Նշվում է, որ հնարավոր համաձայնագիրը, ենթադրաբար, կլինի օրակարգում՝ հուլիսին Անկարայում նախատեսված ՆԱՏՕ-ի գագաթնաժողովից առաջ, գրում է Turkish Minute-ը։

Հաղորդագրության մեջ ասվում է, որ Թուրքիայում SAMP/T երկիր-օդ համակարգի համատեղ արտադրության ծրագրերն «իրականություն են դառնում» եվրոպական օդային և հրթիռային պաշտպանության համակարգ ապահովելու՝ տարիներ շարունակ Թուրքիայի ջանքերի ձգձգումից հետո։

SAMP/T-ն, որն արտադրվում է Eurosam ֆրանս-իտալական համատեղ ձեռնարկության կողմից, որի բաժնետերերն են MBDA France-ը, MBDA Italy-ն և Thales-ը, նախատեսված է ռազմական ուժերը և ռազմավարական օբյեկտները ինքնաթիռներից, թևավոր և բալիստիկ հրթիռներից պաշտպանելու համար։

Համակարգը վաղուց քննարկվում է որպես Թուրքիայի համար հնարավոր եվրոպական այլընտրանք, այն բանից հետո, երբ Անկարայի կողմից 2017 թվականին ռուսական C-400 հակահրթիռային պաշտպանության համակարգի գնումը ճգնաժամ առաջացրեց Միացյալ Նահանգների և ՆԱՏՕ-ի այլ դաշնակիցների հետ։ Վաշինգտոնը հեռացրեց Թուրքիային F-35 կործանիչների ծրագրից C-400-ի գնման պատճառով՝ ասելով, որ ռուսական համակարգը կարող է վտանգել ՆԱՏՕ-ի պաշտպանական տեխնոլոգիաները։ Թուրքիան պնդում է, որ դիմել է Ռուսաստանին՝ իր դաշնակիցներից ընդունելի պայմաններով համեմատելի համակարգեր չապահովելու պատճառով։

Թուրքիան, Ֆրանսիան և Իտալիան 2017 թվականին ստորագրել են մտադրության մասին նամակ՝ ամրապնդելու օդային և հրթիռային պաշտպանության ոլորտում համագործակցությունը, ներառյալ՝ SAMP/T համակարգի հետ կապված աշխատանքները: Ավելի ուշ նախագիծը կանգ առավ Անկարայի և Փարիզի միջև Սիրիայի, Լիբիայի, արևելյան Միջերկրական ծովի և Թուրքիայի՝ Ռուսաստանի հետ կապերի շուրջ քաղաքական լարվածության պատճառով։

Bloomberg-ն ապրիլին հայտնել էր, որ Թուրքիան բանակցություններ է վարում Իտալիայի հետ SAMP/T համակարգ գնելու և համատեղ արտադրելու համար՝ հղում անելով հարցին ծանոթ աղբյուրներին: Intelligence Online-ի վերջին հաղորդագրությունը ենթադրում է, որ Ֆրանսիայի դերը նախագծում վերադարձել է բանակցությունների կենտրոն:

Բանակցությունները տեղի են ունենում Ֆրանսիայի վերջին քայլերի ֆոնին, որոնք ազդարարում էին Թուրքիայի տարածաշրջանային մրցակիցներին շարունակական աջակցության մասին, այդ թվում՝ ապրիլին Հունաստանի հետ Ֆրանսիայի պաշտպանական պայմանագրի երկարաձգումը և մայիսին Մակրոնի կողմից Հայաստանի եվրոպամետ կառավարությանը հրապարակային աջակցությունը։

Սակայն SAMP/T-ի հնարավոր բանակցությունները, ինչպես նաև թուրքական անօդաչու թռչող սարքերի արտադրող Baykar-ի և ֆրանսիական Safran-ի միջև նոր գործընկերությունը, մատնանշում են զուգահեռ ուղի, որում Փարիզը կշռադատում է Թուրքիայի դերը եվրոպական անվտանգության, անօդաչու թռչող սարքերի պատերազմի, օդային պաշտպանության արտադրության, էներգետիկ ուղիների և ՆԱՏՕ-ի պլանավորման մեջ՝ զենքի պակասի, Ռուսաստանի կողմից Ուկրաինայում պատերազմի, Մերձավոր Արևելքում անկայունության և Եվրոպայի նկատմամբ ԱՄՆ անվտանգության պարտավորությունների ապագայի վերաբերյալ անորոշության ժամանակաշրջանում, ասվում է հրապարակման մեջ։

Թարգմանությունը՝ Էմմա Չոբանյանի