26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Թուրքիան և Իսրայելը մերժել են Ուկրաինայի բռնազավթված տարածքներից հացահատիկ տեղափոխող ռուսական նավի մուտքը
Քաղաքականություն
18.05.2026 | 16:11
Ռուսական «Panormitis» բեռնատար նավը, որը տեղափոխում էր գարի և ցորեն, ըստ լուրերի՝ մատակարարված ուկրաինական բռնակցված տարածքներից, մեկ շաբաթվա ընթացքում չի կարողացել մտնել ո՛չ Իսրայելի, ո՛չ Թուրքիայի նավահանգիստներ, գրում է Türkiye Today-ը։
Նավը սպասում էր թուրքական Իսկենդերուն նավահանգստային քաղաքի մոտակայքում, այն բանից հետո, երբ իսրայելցի ներմուծողը հրաժարվել է անցյալ շաբաթ Հայֆայում հացահատիկի բեռը բեռնաթափել։
Մինչ մերժումից հետո թուրքական ջրեր ռուսական նավի դուրս գալը՝ Իսրայելում Ուկրաինայի դեսպան Եվգեն Կորնիյչուկը հույս էր հայտնել, որ Անկարան կհետևի Իսրայելի օրինակին։ Նրա խոսքով՝ Ուկրաինայի Արտաքին գործերի նախարարությունը և Գլխավոր դատախազությունն ակտիվորեն աշխատել են՝ Անկարային համոզելու համար մերժել բեռը և արգելել նավի մուտքը։
«Panormitis»-ը մայիսի 13-ին ժամանել էր թուրքական Իսկենդերուն նավահանգստի ափեր։
Ավելի վաղ Ուկրաինայի նախագահ Վլադիմիր Զելենսկին և արտաքին գործերի նախարար Անդրեյ Սիբիհան Իսրայելին մեղադրել էին գողացված հացահատիկի տարանցումը թույլատրելու համար։ Սակայն Իսրայելի արտաքին գործերի նախարար Գիդեոն Սաարը հերքել էր մեղադրանքները՝ նշելով, որ Կիևը բավարար ապացույցներ չի ներկայացրել այդ պնդումները հիմնավորելու համար։
Նշվում է, որ որպես Կիևի և Մոսկվայի հետ կապեր պահպանող միջնորդ՝ Թուրքիան հետևողականորեն հավասարակշռում է իր աշխարհաքաղաքական պարտավորությունները։
Türkiye Today-ն ավելի վաղ բացահայտել էր, որ Ռուսաստանն ավելի ու ավելի է ապավինում խիստ համակարգված, գաղտնի նավագնացության ցանցին՝ միջազգային պատժամիջոցները շրջանցելու համար։ Ըստ պարբերականի՝ Ռուսաստանի ստվերային նավատորմը շարունակում է հաճախակի այցելել Սիրիայի նավահանգիստներ՝ ուկրաինական հացահատիկով։ Այս նավերը հաճախ անջատում են իրենց ավտոմատ նույնականացման համակարգի (AIS) տրանսպոնդերները, կեղծում փաստաթղթերը և զբաղվում նավից նավ բեռների փոխանցումով՝ դրանց իրական ծագումը թաքցնելու համար։
Թարգմանությունը՝ Էմմա Չոբանյանի
