25.10.2026 | 08:00
Ընտրություններ 10 մարզի 21 համայնքում․ քվեարկությունը սկսված է
Ռոբերտ Արզումանյան․ «Այս հանդիպումը շատ կարևոր խորհուրդ ուներ մեր ակումբի համար»
15.05.2026 | 17:22
«Ուրարտուի» գլխավոր մարզիչ Ռոբերտ Արզումանյանը ֆեյբուքյան գրառումով ամփոփել է Հայաստանի գավաթի խաղարկության եզրափակիչում կրած պարտությունը։
«Այո՛, արդյունքը ցավոտ էր, որովհետև բոլորս ուզում էինք ավարտել երեկոն գավաթով։ Բայց ֆուտբոլը հենց դրա համար է առանձնահատուկ․ այն ոչ միայն հաղթանակներ է տալիս, այլ նաև փորձություն։
Մեծ հպարտություն եմ զգում իմ թիմի նկատմամբ։ Մարզչական շտաբը և խաղացողները մեծ աշխատանք կատարեցին նախապատրաստական շաբաթվա ընթացքում և խաղադաշտում թիմը ցուցադրեց կազմակերպվածություն, կարգապահություն և սեփական գաղափարների նկատմամբ հավատ և վստահություն։
Ամենակարևորը՝ մինչև վերջ մնացինք մեկ միասնական թիմ և չկորցրեցինք մեր դեմքը նույնիսկ ամենաբարդ պահերին։
4-1 հաշվի պայմաններում շատ թիմեր կարող էին կոտրվել հոգեբանորեն, բայց մեր տղաները շարունակեցին պայքարել, շարունակեցին խաղալ համարձակ և նախաձեռնող։ Այդ պահերին հատկապես երևաց թիմի բնավորությունը։
Այս հանդիպումն ուներ նաև մեկ շատ կարևոր խորհուրդ մեր ակումբի համար․ մեկնարկային կազմում էին մեր ակադեմիայի 8 սաներ։
Սա մեծ աշխատանքի, համբերության և զարգացման ճիշտ ճանապարհի արդյունք է։ Երբ սեփական ակադեմիայի խաղացողները նման մակարդակի խաղերում պատասխանատվություն են վերցնում իրենց վրա, դա խոսում է ինքնության և ապագայի մասին։
Շնորհակալ եմ բոլոր խաղացողներին՝ անկախ խաղաժամանակից։ Նրանց վերաբերմունքը, թիմային ոգին և մինչև վերջ պայքարելու պատրաստակամությունը արժանի են միայն հարգանքի»,- գրել է Հայաստանի հավաքականի նախկին ֆուտբոլիստը։
Հիշեցնենք, որ եզրափակիչում «Ուրարտուն» 2։4 հաշվով պարտվել էր «Նոային», որը երկրորդ տարին անընդմեջ դարձել էր Հայաստանի գավաթակիր։
