Հասարակություն
14.05.2026 | 17:20
Առաջիկա խորհրդարանական ընտրությունների մասնակից ուժերի ներկայացուցիչները Կենտրոնական ընտրական հանձնաժողով են ներկայացրել իրենց գույքի և եկամուտների հայտարարագրերը՝ 2026-ի ապրիլի 1-ի դրությամբ։ Factor.am-ն ուսումնասիրել է դրանք և առանձնացրել է քաղաքական ուժերի ցուցակների առաջին թեկնածուների ունեցվածքը։ Ամենահարուստը, թերևս, ԲՀԿ առաջնորդ Գագիկ Ծառուկյանն է։
«Բարգավաճ Հայաստան» կուսակցության թիվ 1 թեկնածու Գագիկ Ծառուկյանն անցած 1 տարում ստացել է 9․4 մլրդ դրամ, 1․8 մլն եվրո, 2․8 մլն դոլար եկամուտ։ Դրանից մոտ 1․4 մլրդը նվիրատվություն է, սակայն նվիրատուի անվան փոխարեն Ծառուկյանը նշել է իր անունը, 1․8 մլն եվրո նա ստացել է բաժնեմասի օտարումից, մնացածը հիմնականում փոխառություն և շահաբաժիններ են, այդ թվում ամենամեծը՝ 4․2 մլրդ դրամ շահաբաժին «Արարատցեմենտ»-ից։ Նա բաժնեմասեր ունի 53 ընկերություններում։
ԲՀԿ ղեկավարը հայտարարագրել է 3․5 մլրդ դրամ, 26․8 մլն դոլար, 5․5 մլն եվրո և 2․3 մլն ռուբլի դրամական միջոցներ։
Նա ունի 24 անշարժ գույք, այդ թվում՝ 1 բնակարան (131.4 քմ), 1 առանձնատուն Առինջում (5234․9 քմ), 13 հողամաս Կոտայքի Առինջ, Ծաղկաձոր, Պռոշյան Վերին Պտղնի համայնքներում (ընդհանուր մոտ 61․4 հա), Գեղարքունիքում և Առինջում 7 շենք-շինություն (768 քմ) և հողին ամրակայված 2 այլ անշարժ գույք (8499 քմ)։
Ծառուկյանը հայտարարագրել է 19 ավտոմեքենա, այդ թվում՝ Rolls-Royce (2007թ․, 2008 թ․ և 2019 թ․ արտադրության), Bentley (2016 թ․), և այլն։
Ծառուկյանը միակն է, որ 8 մլն դրամը գերազանցող արժեքով թանկարժեք 64 գույք է հայտարարագրել, այդ թվում՝ կահույք, ջահեր, ոսկեղեն, ադամանդե ժամացույցներ և այլն, ընդհանուր՝ 6․5 մլն եվրո և 7․3 մլն դոլար արժեքով։
Գայանե Խաչատրյան
