Իրավունք ունեի՞ք Ձեր արձակուրդի մեջ դպրոցի տնօրենների դիմում գրելու հրահանգ տալ. հարց` Փաշինյանին․ ՏԵՍԱՆՅՈՒԹ

Նիկոլ Փաշինյանը լրագրողների հետ ճեպազրույցում հայտարարեց, որ Հայաստանում տեղակայված Ռուսաստանի 102-րդ ռազմաբազայի հետ կապված որևէ մտավախություն չկա՝ կապված Ռուսաստանի քաղաքացիների հնարավոր արտահանձնման գործընթացների հետ։

Հարցին, թե ինչպես է մեկնաբանում Ռուսաստանի Դաշնության նախազգուշացումը իր քաղաքացիներին՝ զգույշ լինել երրորդ երկրներ, այդ թվում՝ Հայաստան մեկնելիս, քանի որ կարող են ձերբակալվել և արտահանձնվել ԱՄՆ-ին, Փաշինյանը պատասխանեց, որ ռազմաբազան պարտավոր է գործել Հայաստանի օրենսդրության շրջանակում։

«102-րդ ռազմաբազան, անկախ նրանից, թե ինչ օրենքներ են գործում Ռուսաստանում, պետք է գործի Հայաստանի օրենսդրության շրջանակում և Հայաստանի իրավազորության ներքո»,- ասաց նա։

Վարչապետի պաշտոնակատարը նաև անդրադարձավ արտահանձնման մեխանիզմներին՝ նշելով, որ եղել են դեպքեր, երբ մարդիկ Հայաստանում ձերբակալվել են թե՛ Միացյալ Նահանգների, թե՛ Ռուսաստանի հայտերով։ Նրա խոսքով՝ եղել են ինչպես արտահանձնման բավարարված, այնպես էլ մերժված դեպքեր։

Նա նաև պարզաբանեց, որ իրավապահները պարտավոր են արձագանքել հետախուզման հայտերին՝ հասկանալու մեղադրանքի բնույթն ու հիմքերը։

Փաշինյանն անդրադարձավ նաև Factor TV-ի լրագրողի հարցին՝ կապված իր արձակուրդում լինելու և հրահանգներ տալու հետ։

«Արձակուրդում եմ։ Ես հրահանգը տվել եմ, կատարեն-չկատարեն՝ իրենց ընտրությունն է, բայց իրենք որոշել են կատարել»,- ասաց նա՝ հավելելով․ «Եթե արձակուրդում եմ, ինչո՞ւ եք այդ հարցերի պատասխանն ինձնից ուզում, գնացե՛ք, Մհեր Գրիգորյանին հարցրե՛ք»։

Մանրամասները՝ տեսանյութում։

Արփի հակոբյան