Ուկրաինայի հակակոռուպցիոն դատախազությունը պահանջել է կալանավորել Անդրեյ Երմակին

Ուկրաինայի Մասնագիտացված հակակոռուպցիոն դատախազության (САП) ղեկավար Ալեքսանդր Կլիմենկոն հայտարարել է, որ գերատեսչությունը դատարան կդիմի՝ նախագահի աշխատակազմի նախկին ղեկավար Անդրեյ Երմակին կալանավորելու խնդրանքով, գրում է Meduza-ն։

Որպես այլընտրանք՝ Դատախազությունն առաջարկում է 180 միլիոն գրիվնայի (շուրջ 4 միլիոն դոլար) չափով գրավի դիմաց ազատ արձակում։

Ուկրաինայի Բարձրագույն հակակոռուպցիոն դատարանը Երմակի նախնական կալանքի հարցը կքննարկի մայիսի 12-ին։ Կլիմենկոն նաև հայտարարել է, որ Ուկրաինայի նախագահ Վլադիմիր Զելենսկին չի մասնակցում Կիևի մոտ շքեղ բնակարանների կառուցման ընթացքում փողերի լվացման գործով հետաքննությանը։

Ուկրաինայի Ազգային հակակոռուպցիոն բյուրոն (НАБУ) և Մասնագիտացված հակակոռուպցիոն դատախազությունը (САП) հայտարարել էին, որ Երմակը կասկածվում է 460 միլիոն գրիվնայի (մոտավորապես 10 միլիոն դոլար) լվացմանը մասնակցած կազմակերպված խմբին մասնակցելու մեջ։ Զելենսկիի գրասենյակի նախկին ղեկավարին մեղադրանք է առաջադրվել հանցավոր գործունեությամբ ձեռք բերված գույքի օրինականացման (լվացման) հոդվածով (Ուկրաինայի քրեական օրենսգրքի 209-րդ հոդվածի 3-րդ մաս)։ Այս մեղադրանքը նախատեսում է 8-ից 12 տարի ազատազրկում։ Երմակը հերքում է մեղադրանքները։

Ուկրաինայի կոռուպցիայի դեմ պայքարի մարմինների տվյալներով՝ գործում ներգրավված է վեց անձ։ Նրանց թվում են նախկին փոխվարչապետ Ալեքսեյ Չեռնիշևը և գործարար Թիմուր Մինդիչը։

Թարգմանությունը՝ Էմմա Չոբանյանի