Վրաստանը նոր կաթողիկոս-պատրիարք ունի

Այսօր Վրաց ուղղափառ եկեղեցու ընդլայնված ժողովում Շիո եպիսկոպոս Մուջիրին ընտրվել է Համայն Վրաստանի նոր՝ 142-րդ կաթողիկոս-պատրիարք։ Եպիսկոպոսները ընտրություն են  կատարել երեք թեկնածուների միջև։ Քվեարկության արդյունքում պատրիարքական գահի տեղապահ, Սենակիի և Չխորոցկիի մետրոպոլիտ Շիո Մուջիրին ստացել է 22 ձայն, Մրովելի-Ուրբնիսի մետրոպոլիտ Հոբ Ակիաշվիլին՝ 9 ձայն, իսկ Փոթիի և Խոբի մետրոպոլիտ Գրիգոլ Բերբիչաշվիլին՝ 7 ձայն։

Ընդլայնված ժողովում քվեարկելու իրավունք ունեին միայն Սուրբ Սինոդի անդամները։ Քվեարկությանը մասնակցել է Սինոդի 38 անդամ, մեկ քվեաթերթիկ անվավեր է ճանաչվել։

Շիո Մուջիրին (ավազանի անունը՝ Էլիզբար) ծնվել է 1969 թվականի փետրվարի 1-ին Թբիլիսիում: 1988 թվականին Թբիլիսիի թիվ 53 միջնակարգ դպրոցն ավարտելուց հետո նա ուսումը շարունակել է Թբիլիսիի պետական ​​կոնսերվատորիայում: 1991 թվականին նա ընդունվել է Շիոմղվիմե վանք, իսկ 1993 թվականի փետրվարի 5-ին ձեռնադրվել է վանական՝ Շիո անունով:  1996 թվականին Համայն Վրաստանի Կաթողիկոս-Պատրիարք Իլիա II-ը հոգևոր սարկավագ Շիոյին ձեռնադրել է քահանա:

1999 թվականի մարտի 6-ից Շիոն ծառայել է Թբիլիսիի Անչիսխատի եկեղեցում: Նույն թվականի սեպտեմբերի 20-ից նա դարձել է Նարիկալայի Սուրբ Նիկողայոս եկեղեցու վանահայր: 2001 թվականի հոկտեմբերից Մոսկվայի վրացական համայնքի Սուրբ Գևորգ եկեղեցու վանահայրն էր, միաժամանակ, սովորել է Սուրբ Տիխոնի աստվածաբանական ինստիտուտում:

2003 թվականի օգոստոսի 18-ին Վրաց ուղղափառ եկեղեցու Սուրբ սինոդը (Ուրբնիսիում) աբբա Շիոյին ընտրել է  նորաստեղծ Սենակի և Չխորոցկու թեմի առաջնորդ։ Սեպտեմբերի 7-ին աբբա Շիոն Սվետիցխովելիի պատրիարքական տաճարում օծվել է որպես եպիսկոպոս՝ Համայն Վրաստանի կաթողիկոս-պատրիարք Իլյա II-ի կողմից։

2009 թվականին նա բարձրացվել է արքեպիսկոպոսի աստիճանի: 2010 թվականի օգոստոսի 2-ին նա նշանակվել է Համայն Վրաստանի Կաթողիկոս-Պատրիարքի հոգևոր եպիսկոպոս: 2017 թվականի նոյեմբերի 23-ին Շիո եպիսկոպոսը նշանակվել է պատրիարքական գահի տեղապահ, իսկ 2018 թվականի հունիսի 21-ին Սուրբ Սինոդի նիստում նրան շնորհվել է սկուֆիայի վրա ադամանդե խաչ կրելու իրավունք:

Թարգմանությունը՝ Էմմա Չոբանյանի