Իրանի պատերազմի ֆոնին՝ Ճապոնիան Ադրբեջանից հում նավթի առաջին խմբաքանակը կստանա

Ճապոնիան առաջին անգամ ադրբեջանական հում նավթի խմբաքանակ կստանա՝ Մերձավոր Արևելքում լարվածության սրումից ի վեր, որը պայմանավորված է Հորմուզի նեղուցով մատակարարումների խափանումներով։ Ադրբեջանական  լրատվամիջոցները, հղում անելով Reuters-ին, նշում են, որ ադրբեջանական նավթ տեղափոխող լցանավը կժամանի Յոկոգամա նավահանգիստ արդեն երեքշաբթի։

Ճապոնիայի Էկոնոմիկայի, առևտրի և արդյունաբերության նախարարության տվյալներով՝ բեռը նախատեսված է ճապոնական Eneos ընկերության համար։ Նախարարության ճգնաժամային կառավարման գծով գլխավոր տնօրենի տեղակալ Նարումի Հոսոկավան նշել է, որ սա Ադրբեջանից Ճապոնիա նավթի առաջին խմբաքանակն է Մերձավոր Արևելքում հակամարտության սկսվելուց ի վեր։

Մինչև փետրվարի վերջին Իրանի դեմ ԱՄՆ-Իսրայել ռազմական արշավի սկսվելը՝ Ճապոնիայի նավթի ներմուծման շուրջ 95%-ը գալիս էր Մերձավոր Արևելքից։ Այնուամենայնիվ, Հորմուզի նեղուցով նավագնացության շրջափակումից հետո Տոկիոն ստիպված էր փնտրել մատակարարման այլընտրանքային աղբյուրներ։

Նշվում է նաև, որ ճապոնական նավթավերամշակման գործարանները պատմականորեն կենտրոնացած են Մերձավոր Արևելքի նավթի վերամշակման վրա, սակայն երկիրն արդեն սկսել է դիվերսիֆիկացնել իր ներմուծումը։

Ադրբեջանից բացի՝ Ճապոնիան ավելացրել է ԱՄՆ-ից նավթի գնումները, ինչպես նաև հում նավթ է ներմուծել Ռուսաստանի «Սախալին-2» նախագծից, որի վրա տարածվում է պատժամիջոցների բացառումը։

2022 թվականին ռուս-ուկրաինական պատերազմի սկսվելուց հետո Ճապոնիան գործնականում դադարեցրել է ռուսական նավթի ներմուծումը և միացել է Մոսկվայի դեմ պատժամիջոցներին։

Մերձավոր Արևելքից մատակարարման պակասը փոխհատուցելու համար Տոկիոն սկսել է օգտագործել նաև իր ռազմավարական նավթային պաշարները։ Մայիսի 8-ի դրությամբ՝ Ճապոնիայի նավթային պաշարները բավարարել են ներքին սպառումը 205 օրվա համար։