17.08.2026 | 10:46
Թավրիզ–Երևան չվերթները երկու տարվա դադարից հետո կվերականգնվեն
ՌԴ-ի կողմից հայտարարված «հրադադարի» առաջին օրը Ուկրաինան ավելի քան 200 ԱԹՍ-ով հարձակում է իրականացրել
Քաղաքականություն
08.05.2026 | 12:32
Ուկրաինան Մոսկվայի վրա անօդաչու թռչող սարքերով զանգվածային հարձակում է սկսել մայիսի 8-ի կեսգիշերից անմիջապես հետո, երբ ուժի մեջ է մտել Ռուսաստանի միակողմանի հրադադարը, հայտնել է Մոսկվայի քաղաքապետ Սերգեյ Սոբյանինը, գրում է Meduza-ն։
Սոբյանինը հայտնել է գիշերը և առավոտյան Մոսկվային ուղղված 27 անօդաչուի ոչնչացման մասին։ Նա որևէ հետևանքի մասին չի նշել։
Ռուսաստանի Պաշտպանության նախարարության զեկույցում նշվում է, որ կեսգիշերից հետո ՌԴ շրջաններում, ընդհանուր առմամբ, ոչնչացվել է 264 անօդաչու թռչող սարք։ Մասնավորապես, Յարոսլավլում հարված է հասցվել նավթավերամշակման գործարանին, խոշոր հրդեհ է բռնկվել: Մարզի ղեկավար Միխայիլ Եվրաևի խոսքով՝ հարձակման հետևանքով ոչ ոք չի տուժել: Ռոստովի մարզի նահանգապետ Յուրի Սլյուսարը հայտնել է, որ անօդաչու թռչող սարքերից բացի՝ տարածաշրջանի վրա խփվել է նաև ուկրաինական հրթիռ:
Բացի այդ, 13 օդանավակայանների աշխատանքը դադարեցվել է Հարավային Ռուսաստանի օդային նավիգացիայի մասնաճյուղի վարչական շենքի վրա անօդաչու թռչող սարքի հարվածի պատճառով, հայտնել է ՌԴ Տրանսպորտի նախարարությունը։
«Աստրախանի, Վլադիկավկազի, Վոլգոգրադի, Գելենջիկի, Գրոզնիի, Կրասնոդարի, Մախաչկալայի, Մագասի, Միներալնիե Վոդիի, Նալչիկի, Սոչիի, Ստավրոպոլի և Էլիստայի օդանավակայաններում գործողությունները ժամանակավորապես դադարեցվել են»,- ասվում է հայտարարությունում։
Ուկրաինան չի մեկնաբանել հարձակումը։
Մայիսի 8-ի կեսգիշերին ուժի մեջ է մտել Ռուսաստանի հայտարարած միակողմանի հրադադարը։ Այն կտևի մինչև մայիսի 9-ի օրվա վերջը։ Ուկրաինան պաշտոնապես չի միացել դրան, իսկ երկրի նախագահ Վլադիմիր Զելենսկին հայտարարել է, որ Ուկրաինայի զինված ուժերը կգործեն «հայելային» ռուսական հարձակումների նկատմամբ։
Ռուսաստանի իշխանությունները բազմիցս սպառնացել են ավերիչ հարձակում սկսել Կիևի կենտրոնի վրա, եթե Ուկրաինայի զինված ուժերը շարունակեն հարձակումները «հրադադարի» ընթացքում։
Թարգմանությունը՝ Էմմա Չոբանյանի
