27.07.2026 | 10:07
Հրանտ-Լեոն Ռանոսն առաջին գոլն է խփել «Տեներիֆեում». ՏԵՍԱՆՅՈՒԹ
Մոսկվայում մայիսի 9-ին բջջային ինտերնետը կանջատվի
Քաղաքականություն
07.05.2026 | 17:08
Ռուսաստանի Թվային զարգացման նախարարությունը հայտարարել է, որ մայիսի 9-ին Մոսկվան ամբողջությամբ կսահմանափակի բջջային ինտերնետի հասանելիությունը, այդ թվում՝ «սպիտակ ցուցակում» ընդգրկված ծառայությունները, ինչպես նաև SMS հաղորդագրությունները, գրում է BBC-ի ռուսական ծառայությունը։
Սահմանափակումներն անհրաժեշտ են «տոնական միջոցառումների անվտանգությունն ապահովելու համար», բացատրել է նախարարությունը։
Մայիսի 7-ին և 8-ին անջատումներ չեն նախատեսվում, սակայն նախարարությունը հավելել է, որ «անվտանգության անմիջական սպառնալիքների» դեպքում կարող են կիրառվել գործառնական սահմանափակումներ։ Մինչդեռ մեկ օր առաջ բջջային օպերատորները սկսել են մոսկվացիներին տեղեկացնել մայիսի 7-ին ինտերնետի հնարավոր խափանումների մասին։
Նմանատիպ անջատում տեղի էր ունեցել Մոսկվայում մայիսի 5-ին։ Այնուհետև օրվա առաջին կեսին բջջային ինտերնետը, այդ թվում՝ «սպիտակ ցուցակում» գտնվող ծառայություններն ու SMS հաղորդագրությունները, անհասանելի էին։
Ապրիլի վերջին BBC-ն և մի շարք այլ լրատվամիջոցներ, հղում անելով աղբյուրներին, հաղորդել էին, որ Մոսկվայում կայանալիք շքերթից առաջ նախատեսվում են բջջային հեռախոսների սահմանափակումներ։ Մասնավորապես, մայիսի 5-ին, 7-ին և 9-ին նախատեսվում էր սահմանափակել բջջային հեռախոսակապի ծառայությունը և, հնարավոր է, SMS հաղորդագրությունները։
Այս տարի մայիսի 9-ին Կարմիր հրապարակում կայանալիք շքերթը կանցկացվի առանց ռազմական տեխնիկայի՝ Ուկրաինայում պատերազմի սկսվելուց ի վեր առաջին անգամ։ Կրեմլը «կրճատված ձևաչափը» բացատրել է Ուկրաինայից եկող «ահաբեկչական սպառնալիքով» և այն փաստով, որ այս տարին հոբելյանական չէ։
Թարգմանությունը՝ Էմմա Չոբանյանի
