Զախարովան հայտարարել է, թե «Ալեն Սիմոնյանը նախանձում է այն արդյունքներին, որոնց Բելառուսը հասել է»

ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, թե ՀՀ Ազգային ժողովի նախագահ Ալեն Սիմոնյանը նախանձում է Բելառուսին։ Ամենշաբաթյա ճեպազրույցում նա անդրադարձել է Բելառուսի հետ կապված Ալեն Սիմոնյանի հայտարարություններին, որն այն «Ռուսաստանի ծայրագավառ էր անվանել»։

«Կարծում եմ՝ Ալեն Սիմոնյանը նախանձում է այն արդյունքներին, որոնց Բելառուսը հասել է, որոնց չի հասել իր երկիրը՝ իր թիմի ղեկավարությամբ։ Դա նախանձից է։ Ցանկանում եք ստուգե՞լ իմ խոսքերը, ուղղակի այցելեք Բելառուս։ Ալեն Սիմոնյանը նույնքան հեռու է լուսնից, որքան Բելառուսի տնտեսական, արդյունաբերական, արտադրական և գյուղատնտեսական հաջողություններից»,- ասել է նա։

Ավելի վաղ ՀՀ ԱԺ նախագահ Ալեն Սիմոնյանը հայտարարել էր, որ «Հայաստանը չպետք է կառավարվի այնպես, ինչպես Բելառուսը»։ Դրանից  հետո Բելառուսի ԱԳՆ-ն բողոք էր հայտնել Երևանին՝ «հայկական կողմի ոչ բարեկամական գործողությունների կապակցությամբ»։ Բելառուսական կողմը հայտարարել էր, թե ՀՀ ԱԺ նախագահի հայտարարությունները Բելառուսի մասին նախընտրական պոպուլիզմ են և Հայաստանի ներքին խնդիրներից հասարակության ուշադրությունը շեղելու փորձ։

«Հայաստանը ծայրագավառ չի լինելու, Հայաստանը քաղաքական կախվածության մեջ չի լինելու, Հայաստանն իր ինքնիշխանության մակարդակը բարձրացնելու է։ Բելառուսի կառավարման օրինակն իմ երկրի համար և ինձ համար անընդունելի է։ Հայաստանն ազատ երկիր է՝ իր ազատ մեդիաներով, մարդու իրավունքներով, օրենքի գերակայությամբ»,- հայտարարել էր Ալեն Սիմոնյանը։

Թարգմանությունը՝ Էմմա Չոբանյանի