Ռուսաստանի երկրորդ խոշորագույն նավթավերամշակման գործարանը դադարեցրել է աշխատանքն Ուկրաինայի հարձակումից հետո

Ռուսաստանի երկրորդ խոշորագույն նավթավերամշակման գործարանը՝ «ԿԻՆԵՖ»-ը (КИНЕФ), որը գտնվում է Լենինգրադի մարզի Կիրիշի քաղաքում, դադարեցրել է գործունեությունը։ Այս մասին գրում է Reuters-ը՝ հղում անելով երկու արդյունաբերական աղբյուրների, փոխանցում է Current time-ը։

Գործակալության տվյալներով՝ ուկրաինական անօդաչու թռչող սարքերը վնասել են նավթավերամշակման չորս հիմնական օբյեկտներից երեքը։

Ուկրաինայի անվտանգության ծառայությունն ու պաշտպանության ուժերը մայիսի լույս 5-ի գիշերը հարձակվել էին  նավթավերամշակման գործարանի վրա։ Ուկրաինական հատուկ ծառայությունները հայտնել էին, որ անօդաչուները հարվածել են նավթի առաջնային վերամշակման համար պատասխանատու երեք օբյեկտներին, ինչպես նաև նավթի պոմպակայանում նավթամթերք պարունակող պահուստարանին։

«Կիրիշինեֆտեօրգսինտեզ»-ը (КИНЕФ) Ռուսաստանի երկրորդ խոշորագույն նավթավերամշակման գործարանն է (Օմսկից հետո) և միակ նավթավերամշակման գործարանը Ռուսաստանի հյուսիս-արևմուտքում: Դրա տարեկան հզորությունը կազմում է մինչև 20,1 միլիոն տոննա նավթ: Գործարանը 15 տեսակի արտադրանք ունի, այդ թվում՝ բենզին, դիզելային վառելիք, ռեակտիվ վառելիք, մազութ, նավթային բիտում և հեղուկ գազ:

Սա առաջին դեպքը չէ, երբ ուկրաինական ուժերը հարձակվում են այս նավթավերամշակման գործարանի վրա։ Անցյալ տարվա հոկտեմբերին անօդաչու թռչող սարքերի հարձակման և հետագա հրդեհի հետևանքով դադարեցվել էր գործարանի առաջնային նավթավերամշակման օբյեկտը։

Թարգմանությունը՝ Էմմա Չոբանյանի