Թրամփը հայտարարել է Հորմուզի նեղուցում «Ազատություն» նախագիծը կարճ ժամանակով կասեցնելու մասին

ԱՄՆ նախագահ Դոնալդ Թրամփը հայտարարել է, որ Վաշինգտոնը ժամանակավորապես կկասեցնի Հորմուզի նեղուցով նավերի ուղղորդման գործողությունը՝ պահպանելով շրջափակումը։ Թրամփի պնդմամբ՝ «մեծ առաջընթաց է գրանցվել Իրանի ներկայացուցիչների հետ ամբողջական և վերջնական համաձայնագրի հասնելու ուղղությամբ», գրում է CNN-ը։

«Հիմնվելով Պակիստանի և այլ երկրների խնդրանքի, Իրանի դեմ արշավի ընթացքում մեր ունեցած հսկայական ռազմական հաջողության և այն փաստի վրա, որ Իրանի ներկայացուցիչների հետ ամբողջական և վերջնական համաձայնագրի հասնելու ուղղությամբ մեծ առաջընթաց է գրանցվել, մենք փոխադարձաբար համաձայնության ենք եկել, որ չնայած շրջափակումը կմնա լիարժեք ուժի մեջ, «Ազատություն» նախագիծը (նավերի տեղաշարժը Հորմուզի նեղուցով) կարճ ժամանակով կկասեցվի՝ հասկանալու համար՝ արդյո՞ք համաձայնագիրը կարող է վերջնականապես կնքվել և ստորագրվել»,- գրել է Թրամփը Truth Social-ում։

Գործողությունը, որի մասին Թրամփը հայտարարել էր կիրակի երեկոյան, ուժի մեջ էր մտել երկուշաբթի։ Կարճ ժամանակ անց ԱՄՆ-ի և Իրանի զինվորականները փոխանակվել էին կրակոցներով և մեղադրանքներով՝ հարցեր առաջացնելով փխրուն հրադադարի վերաբերյալ։

Սակայն Թրամփի վարչակազմի պաշտոնյաները երեքշաբթի պնդել էին, որ հրադադարը չի ավարտվել, միաժամանակ, գովաբանել նավերը նեղուցով ուղղորդելու նոր գործողությունը։

ԱՄՆ պետքարտուղար Մարկո Ռուբիոն, որը հայտարարել էր, որ փետրվարին Իրանի դեմ սկսված մարտական ​​գործողություններն ավարտվել են, Սպիտակ տանը լրագրողներին ասել է, որ ԱՄՆ-ը կենտրոնացած է նոր գործողության վրա, որը նա կարևորագույն ջրային ուղու լիակատար վերաբացման «առաջին քայլ» է որակել։

Պատերազմի նախարար Փիթ Հեգսեթն էլ ճեպազրույցի ժամանակ ասել էր, որ ջանքերն «առանձին և տարբեր» են տարածաշրջանում ընթացող ռազմական գործողություններից։

«Ազատություն նախագիծը պաշտպանական բնույթ ունի, նեղ ուղղվածությամբ և ժամանակավոր, ունի մեկ առաքելություն՝ պաշտպանել առևտրային նավերը իրանական ագրեսիայից»,- ասել էր նա։

Թարգմանությունը՝ Էմմա Չոբանյանի