Զելենսկին խոստացել է հայելային գործել Ռուսաստանի կողմից զանգվածային հարձակումից հետո

Ուկրաինայի նախագահ Վլադիմիր Զելենսկին արձագանքել է Ռուսաստանի կողմից գիշերն իրականացված զանգվածային հարվածին՝ հայտարարելով, որ Ուկրաինան կգործի հայելային։ ՌԲԿ Ուկրաինայի հաղորդմամբ՝ այս մասին Զելենսկին հայտարարել է Տելեգրամում։

Նրա խոսքով՝ գիշերը ռուսական կողմի հիմնական թիրախներն Ուկրաինայի էներգետիկ ենթակառուցվածքային օբյեկտներն են եղել։

Ուկրաինայի նախագահը շեշտել է, որ Ռուսաստանը ցուցադրում է «բացարձակ ցինիզմ»՝ լռություն խնդրելով քարոզչական միջոցառումների համար, միաժամանակ, շարունակելով իրականացնել նման հրթիռային և անօդաչու թռչող սարքերի հարվածներ նախորդող օրերին։ Զելենսկին նշել է, որ հրադադարը կախված է բացառապես ռուսական կողմից։

«Ամեն օր Ռուսաստանը կարող է դադարեցնել կրակը, և դա կկանգնեցնի պատերազմը և մեր պատասխանները։ Խաղաղությունն անհրաժեշտ է, և դա պահանջում է իրական քայլեր։ Ուկրաինան կգործի հայելային»,- նշել է նա։

Հիշեցնենք, որ Ռուսաստանի Պաշտպանության նախարարությունը հայտարարել էր մայիսի 8-ից 9-ը հրադադարի մտադրության մասին։ Նշվել էր, որ եթե Կիևը խախտի հրադադարը, ռուսական ուժերը կսկսեն զանգվածային պատասխան հրթիռային հարված Ուկրաինայի մայրաքաղաքի կենտրոնին։

Զելենսկին հայտարարել է, որ Ուկրաինան Ռուսաստանից որևէ պաշտոնական հարցում չի ստացել հրադադարի չափանիշների վերաբերյալ՝ չնայած ռուսական կողմի հրապարակային հայտարարություններին։ Նա նշել է, որ Ուկրաինան կսկսի հրադադարի ռեժիմը՝ ի պատասխան Մոսկվայի «Հաղթանակի օրվա» հրադադարի առաջարկի։ Այն կսկսվի մայիսի լույս 6-ի գիշերը։

Թարգմանությունը՝ Էմմա Չոբանյանի