Մեզ համար կարևոր է պաշտպանել հայ ժողովրդի ազատությունը՝ ընտրելու իր իսկ ճակատագիրը. ԵԽ նախագահ․ ՏԵՍԱՆՅՈՒԹ

«Թույլ տվեք Եվրոպական միության անունից ևս մեկ անգամ շնորհակալություն հայտնելով Ձեզ Ձեր ջերմ հյուրընկալության համար: Երեկ մենք շատ պատմական պահ ունեցանք՝ Եվրոպական քաղաքական համայնքի առաջին հանդիպմամբ, իսկ այսօր մենք ունենք երկրորդ շատ կարևոր պատմական իրադարձությունը՝ Եվրոպական միության և Հայաստանի միջև երբևէ առաջին գագաթնաժողովը»,- վարչապետ Նիկոլ Փաշինյանի և Եվրոպական Հանձնաժողովի նախագահ Ուրսուլա ֆոն դեր Լայենի հետ հանդիպման ժամանակ ասաց Եվրոպական խորհրդի նախագահ Անտոնիու Կոշտան։

«Սա հստակ ազդանշան է այն մասին, թե ինչպես ենք մենք Եվրոպական միությունում ցանկանում ներգրավվել: Հիմա Հայաստանը թևակոխում է խաղաղության նոր դարաշրջան՝ ամրապնդելով ժողովրդավարական կարգը, և դա, իհարկե, լավ միջավայր է մեր երկկողմ հարաբերությունները զարգացնելու համար: Հայաստան-ԵՄ գործընկերության ռազմավարական օրակարգն ընդունվել է անցյալ դեկտեմբերին, և այդ ժամանակից ի վեր մենք ամրապնդում ու զարգացնում ենք մեր հարաբերությունները։ Մենք նաև սերտորեն համագործակցում ենք անվտանգության և պաշտպանության ոլորտում՝ «Խաղաղության եվրոպական հիմնադրամի» շրջանակներում՝ հիբրիդային սպառնալիքների դեմ համատեղ ջանքերով»։

Կոշտայի խոսքով՝ ԵՄ գործընկերության առաքելությունը, որի մասին որոշումը կայացվել է անցյալ ապրիլին, նպատակ ունի ամրապնդել Հայաստանի ժողովրդավարական դիմակայունությունը. «Մեզ համար շատ կարևոր է պաշտպանել հայ ժողովրդի ազատությունը՝ ընտրելու սեփական ճակատագիրը, և դուք կարող եք հույս դնել մեզ վրա՝ այս ճանապարհը միասին անցնելու հարցում, և մենք միասին կքայլենք մեր ընդհանուր ուղիով: Հայաստանն առանցքային հենասյուն է Հարավային Կովկասի հետ մեր հարաբերություններում։ Այն նաև Եվրոպան Հարավային Կովկասի միջոցով կապում է Կասպից ծովի և Կենտրոնական Ասիայի հետ։ Սա մեր տարածաշրջանների պատմությունն է, և սա կլինի նաև մեր տարածաշրջանների ապագան։ Ահա թե ինչու Եվրոպական հանձնաժողովը և նախագահ ֆոն դեր Լայենը անշուշտ կընդգծեն այս գագաթնաժողովի կոնկրետ արդյունքները, որոնց հիման վրա մենք կարող ենք զարգացնել մեր ռազմավարական գործընկերությունը՝ հանուն մեր ընդհանուր խաղաղ ապագայի և հայ ժողովրդի ու Եվրոպայի բարօրության»։

Մանրամասները՝ տեսանյութում։