25.10.2026 | 22:00
«Ականատես»-ը 407 ընտրատեղամասից 137-ում արձանագրել է 217 խնդիր և հնարավոր ընտրախախտում
ԵՄ-ն հաստատել է Կիևին վարկի տրամադրումը և ՌԴ-ի դեմ պատժամիջոցների 20-րդ փաթեթը
Քաղաքականություն
23.04.2026 | 17:25
Ապրիլի 23-ին Եվրամիությունը պաշտոնապես հաստատել է Ուկրաինային 90 միլիարդ եվրոյի վարկի տրամադրումը, ինչպես նաև Ռուսաստանի դեմ նոր՝ 20-րդ պատժամիջոցների փաթեթը։ Այս մասին X սոցիալական ցանցում հայտնել ԵՄ-ում ներկայում նախագահող Կիպրոսի ներկայացուցիչը, գրում է Current time-ը։
Միևաժամանակ, Ուկրաինայի նախագահ Վլադիմիր Զելենսկին, ըստ լուրերի, ժամանում է Կիպրոս. նա կմասնակցի այսօր կայանալիք ԵՄ գագաթնաժողովին։
Ավելի վաղ խոսելով եվրոպական վարկի մասին՝ Զելենսկին նշել էր, որ Ուկրաինան ակնկալում է ստանալ առաջին տրանշը մայիսի վերջին կամ հունիսի սկզբին։ Միջոցները կօգտագործվեն բանակի, զենքի արտադրության և քաղաքացիական աջակցության համար։
«ԵՄ-ի ռազմավարությունը՝ Ուկրաինայում արդար և երկարատև խաղաղության հասնելու համար, ունի երկու հենասյուն՝ Ուկրաինայի ամրապնդում և Ռուսաստանի վրա ճնշման մեծացում։ Այսօր մենք առաջընթաց ենք գրանցել երկու ճակատներում էլ»,- իր հերթին, X-ում նշել է Եվրոպական խորհրդի նախագահ Անտոնիո Կոշտան։
ԵՄ դեսպանները վարկերի և պատժամիջոցների փաթեթն արդեն հաստատել էին մեկ օր առաջ՝ ապրիլի 22-ին, այն բանից հետո, երբ Հունգարիայի նոր կառավարությունը վերացրել էր վարչապետ Վիկտոր Օրբանի կողմից դրված վետոն, որը ռուսամետ դիրքորոշում ուներ։
Սլովակիայի արտաքին գործերի նախարար Յուրայ Բլանարը Ֆեյսբուքում հայտարարել է, որ հանձնարարել է ԵՄ-ում երկրի ներկայացուցչին չարգելափակել Ռուսաստանի դեմ ԵՄ 20-րդ պատժամիջոցների փաթեթի գրավոր հաստատումը, քանի դեռ «Դրուժբա» խողովակաշարով նավթը «շարունակում է հոսել անխափան և համաձայնեցված որակով»։
Թարգմանությունը՝ Էմմա Չոբանյանի
