Քաղաքականություն
22.04.2026 | 20:30«Ապրելու երկիր» կուսակցության համահիմնադիր Մեսրոպ Առաքելյանը Factor TV-ի հետ զրույցում խոսել է առաջիկա ընտրություններին «Ուժեղ Հայաստան» կուսակցության հետ դաշինքով մասնակցելու, իշխանափոխության հեռանկարի, Արցախի և գերիների հարցի, ինչպես նաև՝ իրենց ուժին ուղղված մեղադրանքների մասին։
Մեկնաբանելով «Ուժեղ Հայաստան» կուսակցության հետ համագործակցության որոշումը՝ Մեսրոպ Առաքելյանը նշել է, որ այն կայացվել է տարբեր քննարկումների արդյունքում՝ գտնելով, որ դա ամենաարդյունավետ ձևաչափն է։
Առաքելյանը վստահ է, որ իշխանափոխության հասնել հնարավոր է մի քանի ընդդիմադիր ուժերի համախմբման միջոցով։ «Այն սցենարը, որ մի քանի ընդդիմադիր ուժեր, միավորվելով, հնարավորություն կունենան իշխանափոխություն անել, իմ տեսակետով իրատեսական է։ Ի վերջո, ժողովրդի կամքն է, որովհետև մենք բազմիցս նշել ենք, որ շատ կարևոր է, որ իշխանափոխությունը տեղի ունենա ընտրություններով, որի նախադեպը Հայաստանում դեռևս չկա»։
Անդրադառնալով իր և Մանե Թանդիլյանի՝ ընտրական ցուցակում չընդգրկվելու հարցին՝ Առաքելյանը շեշտել է, որ իրենց կուսակցությունում խրախուսվում է թիմակիցների առաջխաղացումը, և նրանք չեն սահմանափակվում «մեկ-երկու հոգու ներգրավվածությամբ»։
«Մենք այն կուսակցությունն ենք, որ թիմակիցների ակտիվ ներգրավումը և առաջընթացը կուսակցության նախագահի գլխավորությամբ ոչ թե չի խոչընդոտվում, այլ խրախուսվում է, և ոչ թե մեկ-երկու հոգու ներգրավվածությամբ պետք է սահմանափակվենք՝ «մարդ-կուսակցություն»-ների մոդելով։ Հետևաբար մեր թիմում կան մարդիկ, որոնք, վստահ եմ, իրենց առաքելությամբ մեծ ծառայություն կմատուցեն հայրենիքին՝ անկախ իրենց կարգավիճակից»։
Ի պատասխան դիտարկման, թե իշխանությունները կարող են դաշինքի անդամ երկու կուսակցությունների տարբերանշանները (Մասիս սարը և Արցախն ու յոթ շրջանները) որակել որպես ռևանշիզմի դրսևորում, Առաքելյանը նշել է. «Մասիսի նշանը Հայաստանի Հանրապետության զինանշանի վրա է, որը պետական խորհրդանիշ է։ Հետևաբար, այդ տեսանկյունից չեմ կարծում, որ Մասիսի արտացոլումը որևէ խորհրդանշում բազմաթիվ տեղեր կա»։
Նա նաև քննադատել է իշխանությանը՝ սահմանազատման գործընթացի դանդաղման համար։ «Մենք արդեն մեկ տարուց ավելի է Ադրբեջանի հետ ունենք ուժի մեջ մտած բացառապես մեկ փաստաթուղթ՝ այդ սահմանազատման կանոնակարգը։ Այս ուժի մեջ մտած փաստաթուղթը արդեն մեկ տարուց ավելի է՝ չի գործում։ Այսինքն՝ Ադրբեջանը մեր հետ փաստաթուղթ է ստորագրել ու այս փաստաթղթով փոխադարձ պարտավորությունները չի կատարում»։
Մեսրոպ Առաքելյանը հերքել է այն պնդումները, թե իրենց դաշինքը ռուսամետ է կամ ուղղորդվում է Մոսկվայից։
«Այդ դավադրապաշտությունը կամ այդ ֆեյսբուքյան գրառումները վաղուց արդեն մեզ համար այդպես քննարկման առարկա էլ չեն դառնում։ Ռուբեն Վարդանյանն ու Սամվել Կարապետյանը ընկերներ են, բազմաթիվ նաև ինչ-որ համատեղ ծրագրեր և՛ Արցախում, և՛ Հայաստանում իրականացրել են։ Այդ տեսանկյունից, նրանց հայրենասիրությունը և նրանց ընդհանուրությունը իրենց ընդհանուր հայրենիքն է», – ասել է նա՝ հավելելով. «Միանշանակ հերքում ենք նման որևիցե պիտակ, երբեք չի եղել»։
Հարցազրույցն ամբողջությամբ՝ տեսանյութում։
Ռոբերտ Անանյան
