Իսրայելի կողմից նոր հարված է հասցվել Իրանի Հարավային Պարս գազային օբյեկտին

Իրանի Fars լրատվական գործակալությունը հաղորդել է Ասալույե ափամերձ քաղաքի՝ իրանական գազի արդյունաբերության սրտի մոտ գտնվող նավթավերամշակման գործարանի մոտ տեղի ունեցած մի շարք պայթյունների մասին, գրում է DW-ն։

Այս տարածքը Հարավային Պարս բնական գազի հանքավայրի մի մասն է, որը աշխարհի ամենամեծ հայտնի գազի պաշարն է և ապահովում է Իրանի ընդհանուր գազի մատակարարման մոտ 70%-ը։

Երկուշաբթի օրը Իսրայելի պաշտպանության նախարար Իսրայել Կացը հայտարարել է, որ Իսրայելը հարձակվել է Ասալույեում գտնվող Հարավային Պարսի նավթաքիմիական գործարանի վրա՝ ասելով, որ հարվածի թիրախը «Իրանի ամենամեծ նավթաքիմիական օբյեկտն է… որը պատասխանատու է երկրի նավթաքիմիական արտադրության մոտ 50%-ի համար»։

Մարտի կեսերին Իսրայելը արդեն թիրախավորել էր տարածաշրջանում գտնվող իրանական օբյեկտը, ինչը այդ ժամանակ որակվել էր որպես լուրջ սրացում։ Իրանը պատասխանել էր այդ հարվածին՝ հարձակվելով Կատարի գազային օբյեկտի վրա և պատճառելով զգալի վնաս։

ԱՄՆ նախագահ Դոնալդ Թրամփը հայտարարել էր, որ նախապես չի տեղեկացվել այդ հարվածի մասին, բայց հավելել էր, որ Իսրայելը խոստացել է ձեռնպահ մնալ Հարավային Պարսում գտնվող իրանական զգայուն գազային օբյեկտներին հարվածելուց։

Սակայն դրանից հետո Թրամփն ինքը սպառնացել է թիրախավորել իրանական էներգետիկ ենթակառուցվածքները, եթե Իրանը չբացի Հորմուզի նեղուցը մինչև երեքշաբթի օրվա վերջնաժամկետը։

Թարգմանությունը` Էմմա Չոբանյանի