31.03.2026 | 17:14
Թրամփը հայտարարել է, որ Ֆրանսիան «շատ անօգուտ է Իրանի հարցում»
ԵՄ արտաքին գործերի նախարարները Բուչայի ազատագրման տարելիցին Կիև են ժամանել
Քաղաքականություն
31.03.2026 | 12:42
Եվրամիության արտաքին գործերի նախարարներն ու եվրոպական դիվանագիտության ղեկավար Կայա Կալլասը մարտի 31-ին ժամանել են Կիև՝ ռուսական կողմից ուկրաինական Բուչա քաղաքի ազատագրման չորրորդ տարեդարձի կապակցությամբ, գրում է DW-ի ռուսական ծառայությունը։
Հիշատակի արարողությանը մասնակցելուց հետո եվրոպացի պաշտոնյաներն Ուկրաինայի մայրաքաղաքում հանդիպում կանցկացնեն: Բանակցությունները կկենտրոնանան Հունգարիայի կողմից Ուկրաինային ԵՄ ֆինանսական օգնության ներկայիս արգելափակման, ինչպես նաև հրադադարից հետո Ռուսաստանին պատերազմական հանցագործությունների համար պատժելու հարցի ուղղությամբ։
Կիև ժամանելուն պես Գերմանիայի արտաքին գործերի նախարար Յոհան Վադեֆուլը և Կայա Կալլասը հայտարարել են, որ դեմ են Իրանի հետ պատերազմի ֆոնին Ուկրաինային տրամադրվող աջակցության կրճատմանը։
«Մենք պետք է հստակեցնենք, որ համբերատար ենք, միասնական ենք, և աջակցության թուլացումը տարբերակ չէ»,- ասել է Գերմանիայի արտաքին գործերի նախարարը։
Վադեֆուլի խոսքով՝ սա պետք է լինի Կիևում կայանալիք հանդիպման հիմնական ուղերձը։
Ռուսաստանի կողմից Ուկրաինայի դեմ չորս տարուց ավելի տևող ագրեսիվ պատերազմի արդյունքը ԵՄ-ի համար չափազանց կարևոր է, քանի որ այն վերաբերում է եվրոպական անվտանգությանը, իր հերթին ասել է Կայա Կալլասը։
«Մենք պետք է զբաղվենք սրանով, մենք չենք կարող պարզապես անտեսել այն»,- ընդգծել է նա։
Կիևի մարզի Բուչա փոքրիկ քաղաքը ռուսներից ազատագրվել է 2022 թվականի մարտի 31-ին՝ Ուկրաինայի վրա Ռուսաստանի լայնածավալ ներխուժման սկսվելուց հինգ շաբաթ անց: Քաղաքային իշխանությունների տվյալներով՝ Բուչայի օկուպացիայի ընթացքում զոհվել է 458 խաղաղ բնակիչ, որոնցից 419-ը գնդակահարվել է կամ մահացել խոշտանգումներից: DW-ի գնահատմամբ՝ քաղաքի անունը դարձել է ռուս զինվորականների դաժանության խորհրդանիշ:
Թարգմանությունը՝ Էմմա Չոբանյանի
