02.07.2026 | 16:05
Կալանավորը հացադուլի 51-րդ օրը դադարեցրել է այն․ նրա խափանման միջոց կալանքը փոխվել է
Պորտուգալիայում քահանաների կողմից սեռական բռնության զոհերին ավելի քան 1,6 միլիոն եվրո փոխհատուցում է հատկացվել
Քաղաքականություն
27.03.2026 | 23:30
Պորտուգալիայի եպիսկոպոսների ժողովը հաստատել է քահանաների կողմից սեռական բռնության զոհերի համար ֆինանսական փոխհատուցման 78 դիմումներից 57-ը: Հատկացվել է ավելի քան 1,6 միլիոն եվրո: Մեկ անձի համար առավելագույն գումարը 45,000 եվրո է, նվազագույնը՝ 9,000 եվրո: Առնվազն 10 դիմում դեռ քննության փուլում է, և 11-ը մերժվել է, գրում է The Insider-ը։
Նշվում է, որ դիմումները կարող են մերժվել մի քանի պատճառներով․ եթե գործն արդեն փակվել կամ արխիվացվել է Սուրբ Աթոռի որոշմամբ, եթե դիմորդը դեպքի պահին չափահաս է եղել և չի համարվել խոցելի չափահաս, կամ եթե մեղադրյալը հոգևորականության անդամ չի եղել կամ եկեղեցական գործառույթներ չի կատարել։
«Մենք կցանկանայինք առաջին հերթին դիմել այս բռնությունների բոլոր զոհերին։ Մենք դա անում ենք խորը հարգանքով նրանց ցավի նկատմամբ և գիտակցելով, որ գործ ունենք խորը վերքերի հետ, որոնք մշտական հետք են թողել նրանց կյանքում։ Մենք ընդունում ենք նրանց կրած տառապանքների ամբողջ լրջությունը, որոնք հաճախ տարիներ շարունակ լռության մեջ են մնացել։ Մենք անկեղծորեն գնահատում ենք նրանց կողմից մեզ վստահված վկայությունները և կրկին ներողություն ենք խնդրում պատճառված բոլոր վնասների համար»,- ասվում է եպիսկոպոսների հայտարարության մեջ։
Երեխաների և խոցելի մեծահասակների նկատմամբ սեռական բռնության դեպքերը քննող հանձնաժողովը պարզել է, որ վերջին 70 տարիների ընթացքում քահանաների կողմից բռնության զոհ է դարձել առնվազն 4,815 մարդ։ 2024 թվականին Պորտուգալիայում ստեղծվել է հատուկ հիմնադրամ՝ բռնության զոհերին փոխհատուցում տրամադրելու համար։
Թարգմանությունը՝ Էմմա Չոբանյանի
