01.11.2024 | 23:19
Հրդեհ Գյումրու տներից մեկում
350 թափուր աշխատատեղ կարիերայի տոնավաճառում․ Հայաստանում անցկացվում է Գլոբալ ձեռնարկատիրության շաբաթը
Հասարակություն
16.11.2018 | 19:12
Աշխատանքային հարցազրույցին պատրաստվելու, գրագետ ինքնակենսագրական կազմելու հնարքներ ու հանդիպում պոտենցիալ գործատուի հետ․ գլոբալ ձեռնարկատիրության շաբաթվա շրջանակում Հայաստանում անցկացվում է կարիերայի և ձեռնարկատիրության տոնավաճառ։
Տոնավաճառի համակարգող Հայկուհի Գևորգյանի խոսքով՝ սա մեծ հարթակ է աշխատանք փնտրողների, ինչպես նաև աշխատողների համար, ովքեր ուզում են առաջխաղացում ունենալ։
«Հնարավորություն է տրված ծանոթանալու 54 ձեռնարկությունների գործունեությանը։ Արդեն 350 թափուր աշխատատեղ ենք արձանագրել։ Դրանք ամենատարբեր ոլորտներում են ներկայացված. առյուծի բաժինը ՏՏ ոլորտինն է, որից հետո սպասարկման ոլորտն է, տուրիզմը։ Այլ ոլորտներում ևս թափուր աշխատատեղեր կան»,- նշում է Հայկուհի Գևորգյանը։
Գլոբալ ձեռնարկատիրության նախաձեռնության շրջանակում Աշխատանքի և ձեռնարկատիրության շաբաթը Հայաստանում կազմակերպել է ԱՄՆ դեսպանատունը։ Այն միտված է կապեր ստեղծել հնարավոր ձեռներեցների ու նրանց հետ համագործակցել ցանկացող անձանց միջև։
ԱՄՆ գործերի հավատարմատար Ռաֆիկ Մանսուրն ընդգծում է. անցյալ տարվա ընթացքում գործատուներից բազմիցս լսել են, որ տոնավաճառի շնորհիվ բարելավվել է նրանց աշխատանքի արդյունավետությունը։ Նրանք հնարավորություն են ստացել համալրել իրենց թափուր աշխատատեղերը մոտիվացված և որակյալ կադրերով։
Նախորդ տարի ներկայացված աշխատատեղերն անհամեմատ քիչ են եղել՝ 88 թափուր հաստիք։ Արդյունքում դիմողների 41%-ն աշխատանք է գտել։ Այս տարի առաջարկները շատ են՝ ավելի քան 350 աշխատատեղ, պրակտիկայի և կամավորական աշխատանքի հնարավորություն։
Աշխատանքի և սոցիալական հարցերի նախարարի տեղակալ Արման Ուդումյանի համոզմամբ՝ աշխատանքային տոնավաճառները երկու մեծ նպատակ են հետապնդում. «Առաջինը տեսանելի նպատակ է՝ գործազուրկներին և նոր աշխատանք փնտրողներին գործատուների հետ հանդիպման հարթակ տրամադրել, երկրորդ՝ անուղղակի նպատակն է՝ աշխատանք փնտրողներին հնարավորություն տալ ծանոթանալու աշխատաշուկայի միտումներին, այն ոլորտներին, որտեղ ավելի շատ են թափուր հաստիքներ բացվում, ինչպես նաև հանդիպելու և խոսելու գործատուների հետ՝ փորձելով տեղեկանալ նրանց առաջիկա պլանների մասին կամ նրանց կողմից բացվող հաստիքների մասին»:
Աշխատանք գտնելու ակնկալիքով կարիերայի տոնավաճառին շատերն են շտապում՝ հույսով, որ կհամապատասխանեն ներկայացվող պայմաններին և կլքեն գործազուրկների շարքերը։
Գլոբալ ձեռնարկատիրության շաբաթ նախաձեռնությունը մեկնարկել է 2008 թվականին։ Այն աշխարհի շուրջ 170 երկրում միջոցառումներ է կազմակերպում՝ յուրատեսակ ներդրում ունենալով աշխարհում ձեռնարկատիրության խթանման գործում։
