Արշակ արքեպիսկոպոս Խաչատրյանի գործով դատավորն ինքնաբացարկ հայտնեց․ ՏԵՍԱՆՅՈՒԹ

Արմավիրի մարզի ընդհանուր իրավասության դատարանում այսօր մեկնարկեց Արշակ արքեպիսկոպոս Խաչատրյանի գործով դատավարությունը, որը տևեց ավելի քան մեկ ժամ, ինչի ավարտին դատավոր Գևորգ Մանուկյանը որոշում կայացրեց բավարարել պաշտպանական կողմի միջնորդությունն ու ինքնաբացարկ հայտնեց։

Երբ դատավորը կողմերին իր կենսագրական տվյալներն էր հայտնում, շեշտեց, որ 2008-ից մինչև 2020 թվականն աշխատել է Արմավիրի մարզի քննչական վարչությունում, զբաղեցրել է տարբեր պաշտոններ։

«Սույն քրեական վարույթը քննվել է նույն վարչությունում, սակայն որևէ կերպ որևէ առնչություն չեմ ունեցել վարույթի հետ։ Նաև այս հարցին անդրադառնում եմ այն տեսանկյունից, որ վարույթի նյութերում առկա տվյալների համաձայն՝ թմրանյութի չհայտնաբերման փաստի առթիվ պաշտոնական անփութության կապակցությամբ վարույթ է նախաձեռնված՝ ըստ էության նշված վարչության քննիչների կողմից պաշտոնական անփութություն թույլ տալու ենթադրյալ հանցանքի կապակցությամբ։ 2020-ից 2024 թվականներին զբաղեցրել եմ Արմավիրի մարզի դատախազի տեղակալի պաշտոնը և աշխատանքի բերումով որոշակիորեն աշխատանքային փոխհարաբերություններ եմ ունեցել սույն վարույթով հանրային մեղադրող Հայկ Սահակյանի հետ։ Նաև կողմերին ցանկանում եմ փաստել, որ իմ կողմից մատնանշված հանգամանքները որևէ կերպ ինձ չեն կաշկանդում և չեն խոչընդոտում սույն վարույթով արդար և անկողմնակալ դատարան հանդես գալու համար, ուստի դատարանը ինքնաբացարկի հիմքեր չունի»,- նշեց նա։

Հիմքեր, սակայն, պաշտպանության կողմը գտավ. փաստաբան Երեմ Սարգսյանը և Արսեն Բաբայանը միջնորդություն ներկայացրին ինքնաբացարկի, նշելով, որ վերը թվարկված աշխատավայրում կարող են ողջամիտ կասկած իրենց և հարուցել հանրության մոտ, որ դատավորը լիովին անաչառ չի կարող անցնել գործը։

Որոշ ժամանակ ընդմիջում հայտարարելուց և նույն միջնորդությունը գրավոր տարբերակով ստանալուց հետո դատավորն ինքնաբացարկ հայտնեց։

Մանրամասները՝ տեսանյութում։