«Մեր խոսքը գործ է». ԲՀԿ-ն քարոզարշավին կմասնակցի հին կարգախոսով. Ծառուկյանը մարզեր միայնակ է գնալու

«Բարգավաճ Հայաստան» կուսակցությունն առաջիկա խորհրդարանական ընտրություններին մասնակցելու է «Մեր խոսքը գործ է» կարգախոսով:

Սա, ի դեպ, ԲՀԿ-ի նախորդ՝ 2017 թվականի ընտրությունների կարգախոսն է: Այս տեղեկությունը Factor.am-ին փոխանցեցին ԲՀԿ-ական աղբյուրները: Միաժամանակ նրանք տեղեկացրին, որ քննարկվում է նաև «Հավատա, վստահիր, պահանջիր» կարգախոսի տարբերակը, բայց սա լինելու է որպես ենթակարգախոս:

Տեղեկությունը Factor.am-ի հետ զրույցում հաստատեց նաև «Ծառուկյան» խմբակցության պատգամավոր Իվետա Տոնոյանը: Նա նշեց, որ այս պահին կարգախոսի ընտրության հարցը քննարկման փուլում է և առաջիկայում է հրապարակվելու, բայց հիմնականը լինելու է «Մեր խոսքը գործ է» կարգախոսը: Սա նաև կուսակցության կարգախոսն է: Տոնոյանը միաժամանակ նշեց, որ լինելու են նաև ենթակարգախոսներ:

ԲՀԿ-ական մեր աղբյուրների փոխանցմամբ՝ այս տարի Գագիկ Ծառուկյանը քարոզարշավի նոր ձևաչափ է ընտրել: Նա մարզերում միայնակ է շրջելու: Եթե նախորդ տարիներին թիմով անցնում էին մարզից մարզ, քաղաքից քաղաք, ապա այս տարի ռեյտինգային թեկնածուները իրենց տարածքներում քարոզչություն կիրականացնեն և Ծառուկյանը կայցելի յուրաքանչյուրի տարածք:

Իվետա Տոնոյանն այս տեղեկությունների վերաբերյալ նշեց, որ Գագիկ Ծառուկյանն այցելելու է բոլոր մարզեր: Այժմ ժամանակացույցն է որոշվում:

«Հանդիպումներ են լինելու մարզերում և Երևանում: Ժամանակացույցն այժմ կազմվում է: Տարածքներում իրականացվելու է քարոզչություն և պարոն Ծառուկյանն առանձին հանդիպումներ է ունենալու հանրապետության բոլոր մարզերում»,- ասաց նա:

Factor.am-ը երեկ հղում անելով ՔՊ-ի իր հավաստի աղբյուրներին գրել էր, որ «Իմ քայլը» դաշինքն ընտրություններին մասնակցելու է «Նիկոլ վարչապետ» կարգախոսով: Այսօր արդեն մեր տեղեկությունները հաստատվեցին պաշտոնապես:

Հայկ Վարդանյան