17.04.2026 | 23:38
Ավտոերթով պայմանավորված՝ երթևեկությունը որոշ հատվածներում ժամանակավորապես կսահմանափակվի. ՆԳՆ
Իրանը պաշտոնապես հաստատել է Ալի Լարիջանիի սպանությունը
Քաղաքականություն
18.03.2026 | 10:30
Իրանի Գերագույն ազգային անվտանգության խորհուրդը երեքշաբթի ուշ երեկոյան հաստատել է Իսրայելի հայտարարությունը, որ երկրի Անվտանգության խորհրդի ղեկավար Ալի Լարիջանին սպանվել է գիշերային օդային հարվածի ժամանակ, գրում է France 24-ը։
«Նահատակների մաքուր հոգիները գրկեցին Աստծո արդար ծառա՝ նահատակ Ալի Լարիջանիի մաքրագործված հոգին։ Իրանի և Իսլամական հեղափոխության առաջընթացի համար ամբողջ կյանքի պայքարից հետո նա, ի վերջո, հասավ իր վաղեմի նպատակին, պատասխանեց աստվածային կոչին և պատվով արժանացավ նահատակության քաղցր շնորհին ծառայության խրամատում»,- նշում է խորհուրդը՝ հավելելով, որ նրա որդին և թիկնապահները մահացել են նրա հետ։
Ալի Լարիջանին սպանվել է ավիահարվածի ժամանակ՝ իր որդու՝ Մորտեզայի և մի քանի թիկնապահների հետ միասին։
Հայտարարության մեջ նաև նշվում է, որ հարվածի ժամանակ զոհվել է նաև Ազգային անվտանգության խորհրդի անվտանգության հարցերով փոխքարտուղար Ալիռեզա Բայաթը։
Ավելի վաղ Իսրայելի պաշտպանության նախարար Իսրայել Կացից հետո՝ երկրի բանակը նույնպես հաստատել էր, որ Իրանի Անվտանգության խորհրդի քարտուղար Լարիջանին սպանվել է ավիահարվածի ժամանակ։
Երեքշաբթի Իրանը նաև հաստատել էր, որ «Բասիջ» ռազմականացված ուժերի ղեկավար Ղոլամռեզա Սոլեյմանին սպանվել է «ամերիկա-սիոնիստական թշնամու կողմից իրականացված ահաբեկչական հարձակման» արդյունքում։
Իրանի կիսապաշտոնական Mehr լրատվական գործակալության հաղորդմամբ՝ Լարիջանիի և Սոլեյմանիի հուղարկավորությունը տեղի կունենա չորեքշաբթի ։
Fars լրատվական գործակալությունը հայտնել է, որ նախագահ Մասուդ Փեզեշքիանը «խորը ցավ և ափսոսանք» է հայտնել Լարիջանիի մահվան կապակցությամբ։
«Ես նրանից ոչինչ չտեսա, բացի բարյացակամությունից, խորաթափանցությունից, ընկերությունից և հեռատեսությունից։ Անկասկած, շատ դժվար է փոխհատուցել այս կորուստը»,- ասել է նա։
Թարգմանությունը՝ Էմմա Չոբանյանի
