Լարիջանին և նրա որդին հարձակման են ենթարկվել այն բնակարանում, որտեղ թաքնվում էին. իսրայելական ԶԼՄ-ներ

Իսրայելական լրատվամիջոցները հաղորդում են, որ Իրանի Անվտանգության խորհրդի քարտուղար Ալի Լարիջանին որդու հետ հարձակման է ենթարկվել բնակարանում, որը որպես թաքստոց էր ծառայում, գրում է BBC-ն։

Իսրայելի պաշտպանության նախարար Իսրայել Կացն այսօր ավելի վաղ հայտարարել էր, որ Լարիջանին «վերացվել է», և որ ինքն ու վարչապետը հրահանգել են զինվորականներին՝ «շարունակել հետապնդել» Իրանի ղեկավարությանը։

Իրանի անվտանգության խորհրդի քարտուղարը հանրությանը ներկայացել էր անցյալ ուրբաթ, երբ մասնակցում էր Ղոդսի օրվա հանրահավաքներին։ Նա Իրանի նախկին միջուկային բանակցողն էր, պատերազմի առաջին օրը սպանված գերագույն առաջնորդ այաթոլլա Ալի Խամենեիի մտերիմ դաշնակիցը։ Նրա մահվան մասին Իրանից որևէ հաստատում չկա։

Միաժամանակ, Լարիջանիի X-ի նրա էջում հրապարակվել է նրա ցավակցական նամակը Շրի Լանկայի ափերի մոտ մարտի 4-ին IRIS Dena ֆրեգատի վրա ԱՄՆ ռազմածովային ուժերի կողմից իրականացված հարվածի հետևանքով իրանցի նավաստիների զոհվելու կապակցությամբ՝ Իսրայելի կողմից նրա սպանության մասին պնդումների ֆոնին։

«Նրանց հիշատակը հավերժ կմնա Իրանի ժողովրդի սրտերում, և այս նահատակությունները կամրապնդեն Իսլամական Հանրապետության բանակի հիմքերը զինված ուժերում՝ առաջիկա տարիների ընթացքում»,- նշվում է ցավակցական ուղերձում։

Իրանական լրատվամիջոցների և Ալի Լարիջանիի Telegram և X հաշիվներում հրապարակված գրառման մեջ կարելի է տեսնել ձեռագիր նամակի լուսանկարը, որի վրա ամսաթվի կնիք չկա, սակայն այն այսօր է ներկայացվում։

Թարգմանությունը՝ Էմմա Չոբանյանի