24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Իսրայելի պաշտպանության նախարարը հրաժարական է տվել. պատճառը ՀԱՄԱՍ-ի հետ հրադադարն է
Քաղաքականություն
14.11.2018 | 17:48
Իսրայելի պաշտպանության նախարար Ավիգդոր Լիբերմանը հայտարարել է հրաժարականի մասին՝ որոշումը պատճառաբանելով պաղեստինյան ՀԱՄԱՍ շարժման հետ հրադադարի պայմանագիր կնքելու փաստով: Այս մասին գրում է «Վեդոմոստին»՝ վկայակոչելով Jerusalem Post-ը:
«Ես փորձեցի նախարարների կաբինետի հավատարիմ անդամ մնալ, սակայն երեքշաբթի նախարարների կաբինետի ընդունած որոշումը՝ ՀԱՄԱՍ-ի դեմ կրակը դադարեցնելու մասին, չի կարող մեկնաբանվել այլ կերպ, քան ահաբեկչության դեմ կապիտուլյացիա»,- հայտարարել է Լիբերմանը:
Նա կարծում է, որ ՀԱՄԱՍ-ի հետ հրադադարը երկարաժամկետ հեռանկարում լուրջ վնաս կհասցնի Իսրայելի անվտանգությանը:
Ավիգդոր Լիբերմանն Իսրայելի կառավարության այն անդամներից էր, որոնք կոչ էին անում պատերազմ սկսել պաղեստինյան ՀԱՄԱՍ շարժման դեմ՝ ի պատասխան շաբաթվա սկզբին զինյալների կողմից Իսրայելի հարավի հրթիռակոծման:
ՀԱՄԱՍ-ի հարվածների նախօրեին իսրայելական հատուկ ջոկատայինները գաղտնի գործողություն էին իրականացրել Գազայի հատվածում: Իսրայելցի զինվորականները քաղաքացիական ավտոմեքենայով թափանցել էին Գազայի հատվածի հարավ, սակայն հայտնաբերվել և գնդակոծվել էին ՀԱՄԱՍ-ի զինյալների կողմից և տարհանվել:
Դրանից հետո ՀԱՄԱՍ-ը սկսել է հրթիռակոծել Իսրայելի հարավը՝ ավելի քան 400 հրթիռ արձակելով: Ի պատասխան՝ Իսրայելը հարվածներ է հասցրել Գազայի հատվածում 100 թիրախների ուղղությամբ:
Ավիգդոր Լիբերմանն Իսրայելի արձագանքը բավարար չի համարում՝ հայտարարելով, որ երկիրն այդպիսով թուլություն է ցուցաբերում:
