24.04.2026 | 00:23
Սպերցյանի գոլն օգնել է «Կրասնոդարին» հաղթել «Սպարտակին»․ ՏԵՍԱՆՅՈՒԹ
Առաջիկա ընտրությունները կարող են դառնալ լավագույնը Հայաստանի պատմության մեջ․ Եվրոպական երկրների գործուն աջակցությունը
Քաղաքականություն
14.11.2018 | 16:24
Դեկտեմբերի 9-ի արտահերթ ընտրություններին ընդառաջ՝ միջազգային հանրությունն աջակցության պատրաստակամություն է հայտնել։ ՄԱԿ-ի զարգացման ծրագրի կողմից իրականացվող «Հայաստանում ընտրական գործընթացների աջակցություն» ծրագիրը միտված է օժանդակել Հայաստանի իշխանություններին՝ իրականացնել վստահելի ու թափանցիկ արտահերթ ընտրություններ, ինչպես նաև ամրապնդել Հայաստանի ընտրական մարմինների կարողությունները։
Արարողությանը ներկա առաջին փոխվարչապետի խոսքով՝ ծրագրի առաջնահերթ նպատակը դեկտեմբերի 9-ին անցկացվելիք արտահերթ խորհրդարանական ընտրություններին աջակցությունն է։ Այդուհանդերձ, ունեն նաև երկարատև պլաններ՝ աջակցելու և կայունացնելու Հայաստանի ընտրական գործընթացներն առհասարակ։
«Հույս եմ հայտնում, որ մենք կշարունակենք մեր ջանքերը և մի շարք միջազգային գործընկերներ, որոնք այս ընթացքում մասնակցել են մեր աշխատանքներին, այլևս պաշտոնապես կանդամակցեն ծրագրին»,- ընդգծեց փոխվարչապետը։
Հայաստանի կառավարության պաշտոնական դիմումի արդյունքում ծրագրի իրականացման նպատակով Եվրոպական միության, Գերմանիայի, Մեծ Բրիտանիայի և Շվեդիայի կառավարությունները հատկացրել են, համապատասխանաբար, 1.5 միլիոն եվրո, 700 հազար եվրո, կես միլիոն ֆունտ ստեռլինգ և 1.5 միլիոն շվեդական կրոն՝ «Հայաստանում ընտրական գործընթացների աջակցություն» ծրագիրն իրականացնելու համար։
Իսկ ահա Հայաստանի կառավարությունը հատկացրել է 700 հազար դոլար։ Հայաստանում Եվրամիության դեսպան Պյոտր Սվիտալսկու համոզմամբ՝ առաջիկա ընտրությունները կարող են դառնալ լավագույնը Հայաստանի պատմության մեջ և նույնիսկ օրինակ ծառայել այլ երկրների համար։
«Այն ջանքերը, որ ԵՄ-ն և նրա երեք առաջատար անդամները ներդնում են, օգնելու են հայ ընտրողներին վստահ լինել, որ իրենց քվեն չի գողացվի և տեղ կհասնի»,- նշեց Պյոտր Սվիտալսկին։
Ծրագրի թիրախում մի քանի կարևոր կետ կա․ քվեարկության ընթացքի ու արդյունքների ամփոփման ուղիղ հեռարձակումը, երիտասարդ ընտրողների իրազեկվածությունը, ինչպես նաև անհրաժեշտ տեխնիկական աջակցությունը։ Նախատեսված հանձնառություններն ամրագրող փաստաթուղթ ստորագրվեց։ Արդեն հետընտրական շրջանում՝ ծրագիրը, ԿԸՀ-ի հետ համագործակցելով, կստեղծի նաև էլեկտրոնային ուսուցման հարթակ, որը թույլ կտա մշակել նյութեր՝ թիրախային ամենատարբեր լսարանների համար։
Նելլի Մելքոնյան
