ՔՊ-ի և «Ուժեղ Հայաստան»-ի 300 հազարական նոր աշխատատեղերը․ Փա՞ստ, թե՞ փուստ․ ՏԵՍԱՆՅՈՒԹ

300 հազար աշխատատեղ ընտրություններից առաջ, 300 հազար էլ՝ ընտրություններից հետո։ Սրանք իշխանության և ընդդիմության կարևոր ուղերձներից են՝ ընտրություններին ընդառաջ։ Բայց սրանցից որն է փաստ, որը փուստ՝ պատմել ենք Փա՞ստ, թե՞ փուստի այսօրվա թողարկմանը։

«Մեր ձևով» շարժման համակարգող Նարեկ Կարապետյանը հայտարարում է, որ իրենց ծրագրով նախատեսվում է 300 հազար նոր աշխատատեղ ստեղծել։ Նախարար Արսեն Թորոսյանը հակադարձում է, թե դա արդեն արվել է։

«281 հազար 234 է։ Այսինքն՝ մենք, ըստ էության, հեղափոխությունից մինչև օրս 281 հազար աշխատատեղ ենք ստեղծել, մոտ 300 հազար աշխատատեղ ենք ստեղծել»,- ասում է Թորոսյանը։

Նա նշում է, որ սրա մի մասը ստվերից դուրս բերված տեղերն են։

Բայց, ըստ Արմստատի, 2018-2024 թվականներին զբաղվածների թիվն աճել է ընդամենը 130 հազարով։ Ստացվում է՝ շուրջ 150 հազար մարդ ուղղակի փոխել է զբաղմունքը (օրինակ՝ գյուղատնտեսությունից անցել առևտրի ոլորտ)։

Ինչ վերաբերում է ընդդիմադիր «Ուժեղ Հայաստան» կուսակցության խոստմանը, Նարեկ Կարապետյանն ասում է. «Մենք 5 տարում ապահովելու ենք 300 հազար նոր աշխատատեղ մեր երկրում, մեր երկրի բոլոր շրջաններում»։

Սակայն 2025 թվականի տվյալներով՝ գործազուրկների և պոտենցիալ աշխատուժի ընդհանուր թիվը 232,7 հազար է։ Խոստումը կատարելու համար պետք է ոչ միայն զրոյացնել գործազրկությունը, այլև աշխատաշուկա բերել ևս 70 հազար հոգու, որոնք այս պահին չեն պատրաստվում աշխատել։

Մանրամասները՝ տեսանյութում։

Գարիկ Հարությունյան