Պաշտոնանկություններ ՆԳՆ-ում՝ աղմկոտ սպանություններից հետո․ արդյո՞ք կապ կա. ՏԵՍԱՆՅՈՒԹ

Ներքին գործերի նախարարությունում կադրային փոփոխություններ են։ Նախարարը ազատել է ոստիկանության երեք գլխավոր ծառայությունների պետերի և նոր նշանակումներ արել։

Այսպես՝ երեկ երեկոյան պաշտոնից ազատված ՆԳՆ ոստիկանության քրեական ոստիկանության գլխավոր վարչության պետ, ոստիկանության պետի տեղակալ, ոստիկանության գնդապետ Վարդան Վարդանյանին այդ պաշտոնում կփոխարինի ոստիկանության գնդապետ Արթուր Բարսեղյանը։

Պաշտոնից ազատված ՆԳՆ ոստիկանության համայնքային ոստիկանության գլխավոր վարչության պետ, ոստիկանության պետի տեղակալ, գնդապետ Կարեն Հակոբյանին ժամանակավոր կփոխարինի տեղակալը՝ ոստիկանության գնդապետ Կարեն Խաչատրյանը․ նա նշանակվել է համայնքային ոստիկանության գլխավոր վարչության պետի պարտականությունները կատարող։

Իսկ պաշտոնից ազատված ՆԳՆ ոստիկանության պարեկային ծառայության պետ, ոստիկանության պետի տեղակալ, ոստիկանության գնդապետ Արթուր Խուդինյանի փոխարեն նշանակվել է ոստիկանության փոխգնդապետ, Պարեկային ծառայության Արարատի մարզի գումարտակի հրամանատար Գևորգ Զաքարյանը։

Արդյոք այս կադրային փոփոխությունները կարող են համակարգային խնդիրներ լուծել։
«Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանի խոսքով՝ ոստիկանությունում մի շարք խնդիրներ կան, և դրանք միայն կադրեր փոխելով չեն լուծվի, թեև որոշակի թարմություն կարող է հաղորդվել համակարգին։

ԱԺ «Հայաստան» խմբակցության պատգամավոր Գառնիկ Դանիելյանի գնահատմամբ՝ անպատժելիության մթնոլորտում նման կոսմետիկ փոփոխությունները որակական արդյունք չեն տալու։

Մյուս կողմից՝ էկոնոմիկայի նախարար Գևորգ Պապոյանի կարծիքով՝ եթե պաշտոնյաները հեռացվել են, ապա վարչապետը, ներքին գործերի նախարարը կամ ոստիկանապետը ինչ-որ խնդիր են տեսել նրանց աշխատանքում, և դա նորմալ գործընթաց է։
Այս փոփոխությունները որքանո՞վ կապ ունեն ավերջին շրջանում տեղի ունեցած աղմկոտ սպանությունների դեպքերի հետ։ Դանիել Իոաննիսյանի դիտարկմամբ՝ խնդիրն ընդհանուր հանցավորության մակարդակն է, կանխարգելման ու հակազդման արդյունավետությունը, ինչի մասով լուրջ խնդիրներ կան։

Ընդդիմադիր պատգամավորն էլ կարծում է, որ իշխանությունը փորձում է ցույց տալ, թե մեղավորները կոնկրետ մարդիկ են, մինչդեռ խնդիրը համակարգային լուծում է պահանջում։

Ազատված պաշտոնյաներն անգործ չեն մնա․ Արփինե Սարգսյանի մեկ այլ հրամանով՝ Վարդան Վարդանյանն ու Կարեն Հակոբյանը նշանակվել են նախարարի խորհրդական, իսկ Արթուր Խուդինյանը՝ նախարարի օգնական։

Գևորգ Պապոյանը ենթադրում է, որ նախարարն այդ պաշտոնյաների փորձն ու խորհուրդները դեռ օգտակար է համարում և այդ պատճառով էլ պահում է համակարգում։

Վիճակագրական կոմիտեի տվյալներով՝ հրազենով հանցագործությունները տարեցտարի աճել են՝ 2023-ին՝ 94 դեպք, 2024-ին՝ 109, իսկ 2025 թվականին նման 152 դեպք է գրանցվել։ ՆԳ նախարար Արփինե Սարգսյանը ևս շաբաթներ առաջ ընդգծել էր, որ զենքի օգտագործմամբ կատարված հանցագործություններն աճել են։

Մանրամասները՝ տեսանյութում։

Արփի Հակոբյան