Քաղաքականություն
13.11.2018 | 12:53
Թուրքիայի արտգործնախարար Մևլութ Չավուշօղլուին զայրացրել են Ֆրանսիայի արտգործնախարար Ժան-Իվ Լը Դրիանի՝ սպանված սաուդցի լրագրող Ջեմալ Խաշոկջիի թեմայով Թուրքիային ուղղված մեղադրանքները, որոնցում ֆրանսիացի նախարարը պնդել էր, որ Թուրքիան իրենց չի տրամադրել սպանության ձայնագրությունը: Ինչպես նաև ֆրանսացի նախարարը հայտարարել էր, որ Թուրքիայի նախագահը սպանված լրագրողի գործը օգտագործում է քաղաքական խաղ խաղալու համար. փոխանցում է ermenihaber-ը:
Պատասխանելով այս հայտարարություններին Չավուշօղլուն ասել է. «Նախևառաջ Ֆրանսիայի արտաքին գործերի նախարարը չափն անցել է։ Նա պետք է իմանա, թե ինչպես խոսել նախագահի հետ։ Եվ երկրորդ՝ Թուրքիայի նախագահ Ռեջեփ Էրդողանին Ֆրանսիայի նախագահի հետ թող չշփոթի»:
Նա, անդրադառնալով սաուդցի լրագրողի սպանության ձայնագրությունը, պնդել է, որ թուրքական հետախուզությունը իր ձեռքում եղած տեղեկությունները և ձայնագրությունները տրամադրել են ֆրանսիական կողմին:
Բացի այդ, Չավուշօղլուն նշել է, որ Թուրքիայի նախագահին քաղաքական խաղ խաղալու մեջ մեղադրելը լկտիություն է:
