Մեծ Բրիտանիան Հյուսիսային Ատլանտիկա կուղարկի ավիակիր՝ «ռուսական ագրեսիան զսպելու և ստորջրյա ենթակառուցվածքները պաշտպանելու համար»

Մեծ Բրիտանիան այս տարի Հյուսիսային Ատլանտիկայում և Արկտիկայում կտեղակայի ավիակիրային հարվածային խումբ՝ տարածաշրջանում անվտանգության ամրապնդման նպատակով։

«Թագավորական նավատորմի ռազմական նավերի, F-35 կործանիչների և ուղղաթիռների մասնակցությամբ ուժի հզոր ցուցադրությունը միտված է ռուսական ագրեսիան զսպելուն և կենսական նշանակություն ունեցող ստորջրյա ենթակառուցվածքների պաշտպանությանը», -ասվում է բրիտանական կառավարության կայքում հրապարակված հայտարարության մեջ։

Նշվում է, որ վերջին երկու տարիներին Մեծ Բրիտանիայի ջրերին սպառնացող ռուսական ռազմական նավերի թիվը աճել է շուրջ 30 տոկոսով։

«Գրենլանդիայի, Իսլանդիայի և Մեծ Բրիտանիայի շրջանում ռուսական գործողությունների առնչությամբ աճող մտահոգության, ինչպես նաև կենսական նշանակություն ունեցող ստորջրյա մալուխների և խողովակաշարերի նկատմամբ ռիսկերի ավելացման պայմաններում ուժերի տեղակայումը հստակ ազդակ կլինի, որ Մեծ Բրիտանիան միշտ կպաշտպանի իր ջրերը, կպահպանի կարևոր ենթակառուցվածքները և ուս ուսի կանգնած կլինի իր դաշնակիցների կողքին», – նշված է հայտարարության մեջ։

Firecrest գործողությունը կգլխավորի HMS Prince of Wales ավիակիրը՝ բրիտանական Թագավորական նավատորմի ամենամեծ նավը։ Տեղակայումը ներառելու է լայնածավալ ռազմական զորավարժություններ՝ համատեղ ԱՄՆ-ի, Կանադա-ի և հյուսիսաեվրոպական դաշնակիցների հետ։ Ավիակիրային հարվածային խումբը կհատի Ատլանտիկ օվկիանոսը՝ այցելելով ԱՄՆ-ի նավահանգիստ, և HMS Prince of Wales-ի տախտակամածից գործելու են նաև ամերիկյան կործանիչներ։

Բրիտանական ավիակիրային հարվածային խումբը կմասնակցի նաև ՆԱՏՕ-ի Arctic Sentry առաքելությանը, որը մեկնարկել է այս շաբաթվա սկզբին։ Առաքելության նպատակն է ամրապնդել Դաշինքի անվտանգությունը այն տարածաշրջանում, որտեղ ծովային սառույցի հալման հետևանքով բացվում են նոր ծովային երթուղիներ՝ մեծացնելով թշնամական պետությունների կողմից սպառնալիքները։ Հունվարին ՆԱՏՕ-ի գլխավոր քարտուղար **Մարկ Ռյուտե**ն նաև հայտարարել էր Baltic Sentry առաքելության մեկնարկի մասին՝ Բալթիկ ծովում կարևոր ենթակառուցվածքների պաշտպանության համար։