Մենք դեմ ենք սահմանադրական կարգի բռնի տապալմանը, բայց օրենքը պետք է հստակ լինի․ Մինասյան․ ՏԵՍԱՆՅՈՒԹ

«Տեսալսողական մեդիայի մասին» օրենքում նախատեսվող փոփոխությունների քննարկման ժամանակ «Հայաստան» խմբակցության պատգամավոր Արծվիկ Մինասյանը դժգոհեց նախագծում սահմանումներում հստակ չափանիշների բացակայությունից։

«Այս բովանդակությամբ ներկայացումն ուղղակի հակասում է հենց նույն սահմանադրական կարգավորումներին՝ մտքի, խոսքի, տարածման ազատության տեսակետից: Նորից եմ կրկնում՝ բացարձակապես որևէ մեկը կողմ չէ սահմանադրական կարգի բռնի տապալմանը, չգիտեմ՝ քրեական ենթամշակույթի քարոզին և այլն, և այլն: Մենք ասում ենք՝ հստակ չափանիշ պետք է լինի և զերծ այս կամ այն քաղաքական ուժի ցանկությունից»,-նշեց նա։

Նշենք՝ օրինագծով արգելվում է սահմանադրական կարգը բռնի տապալելու, պատերազմ քարոզելու նպատակ հետապնդող տեղեկատվություն տարածելը: Արգելվում է բռնություն և դաժանության քարոզ պարունակող, ազգային, ռասայական, սեռային, կրոնական ատելություն բորբոքելու, տարիքային, հաշմանդամության, անձնական կամ սոցիալական բնույթի այլ հատկանիշներով պայմանավորված խտրականություն սերմանելը կամ նման նպատակ հետապնդող տեղեկատվություն, ինչպես նաև՝ պոռնկագրություն տարածելը:

Արգելվում է քրեորեն պատժելի կամ օրենսդրությամբ արգելված այլ արարքների կոչեր տարածելը: Կարգավորող պետական մարմինը՝ Հեռուստատեսության և ռադիոյի հանձնաժողովը, օրենքով իրեն վերապահված վերահսկողական գործառույթների իրականացման ընթացքում Քրեական օրենսգրքով արգելված արարքի հատկանիշներ հայտնաբերելու դեպքում կդիմի իրավասու մարմիններ:

Առաջարկվել է էրոտիկ բնույթի տեսալսողական հաղորդումները և սարսափ ու ակնհայտ բռնություն պարունակող ֆիլմերը, քրեական ենթամշակույթի քարոզ պարունակող ֆիլմերն ու տեսալսողական հաղորդումները, ինչպես նաև անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող հաղորդումները եթեր հեռարձակել ժամը 24:00-06:00-ն:

Օրենքի նախագծով արգելվում է օտարերկրյա տեսալսողական ծրագրերում՝ Հայաստանի Հանրապետության ներքաղաքական կյանքին միջամտության բովանդակության տարածումը: Արգելվում է նաև պետության հայտարարած սգո և հիշատակի օրերին հեռարձակողների կողմից զվարճալի հաղորդումների ևգովազդի հեռարձակումը:

Կարգավորող պետական մարմինը կսահմանի տեսալսողական հաղորդումների նկատմամբ տարածվող չարաշահման արգելքների չափորոշիչները:

Մանրամասները՝ տեսանյութում։