The Telegraph-ը բացահայտել է ՌԴ-ից Իրան գաղտնի 2,5 միլիարդ դոլարի կանխիկ փոխանցումներ․ նշվում է առնվազն ևս 1,9 միլիարդ դոլարի մասին

Բրիտանական The Telegraph-ի տվյալներով՝ 2018 թվականին Ռուսաստանը գաղտնի կերպով Իրանին է փոխանցել առնվազն 2,5 միլիարդ դոլար կանխիկ՝ ԱՄՆ պատժամիջոցների սահմանումից հետո երկրի իշխանություններին աջակցելու համար։ Սակայն, ինչպես պարզել է The Insider-ը, The Telegraph-ը բացահայտել է առաքումների միայն մի մասը։

Նկարագրված 34 առաքումներից բացի՝ 2018 թվականին «Միջազգային ֆինանսական ակումբ» առևտրային բանկն Իրան է ուղարկել ևս մի քանի կանխիկ առաքումներ՝ ընդհանուր 1,9 միլիարդ դոլարի չափով։ Սա պատժամիջոցների սահմանումից ի վեր փոխանցված ընդհանուր գումարը հասցնում է առնվազն 4,4 միլիարդ դոլարի։

Բրիտանական պարբերականի տվյալներով՝ Ռուսաստանի պետական ​​«Պրոմսվյազբանկը» չորս ամսվա ընթացքում իրականացրել է առնվազն 34 առաքում (չհաշված The Insider-ի կողմից նույնականացված և վերը նշված Միջազգային ֆինանսական ակումբի լրացուցիչ առաքումները), որոնցից յուրաքանչյուրի արժեքը կազմում է 57 միլիոնից մինչև 115 միլիոն դոլար։ Գրեթե հինգ տոննա թղթադրամներ, ենթադրաբար, 500 եվրո արժողությամբ, գնացքով տեղափոխվել են Աստրախան, այնուհետև Կասպից ծովով նավով՝ Իրանի Ամիրաբադ նավահանգիստ, ապա երկաթուղով Թեհրան՝ Իրանի Կենտրոնական բանկի հասցեով։

Առաջին խմբաքանակը, ըստ The Telegraph-ի, ուղարկվել է 2018 թվականի օգոստոսի 13-ին՝ մեկ շաբաթ անց այն բանից հետո, երբ ԱՄՆ նախագահ Դոնալդ Թրամփը ստորագրեց Թեհրանի նկատմամբ պատժամիջոցներ կիրառելու մասին գործադիր հրամանագիրը:

ImportGenius ծառայության կողմից տրամադրված մաքսային գրառումների համաձայն՝ գումարը Սմիրնովսկայա փողոցում գտնվող «Պրոմսվյազբանկի» մոսկովյան մասնաճյուղից ուղարկվել է ուղիղ Միրդամադ բուլվարում գտնվող Իրանի կենտրոնական բանկի շենք: Բանկը 2017 թվականին Կրեմլի կողմից ազգայնացվել է և վերափոխվել «պաշտպանական արդյունաբերության ձեռնարկություններին սպասարկելու մասնագիտացված բանկի»: Այն ժամանակ այն ղեկավարում էր Պյոտր Ֆրադկովը՝ Արտաքին հետախուզության ծառայության նախկին ղեկավարի որդին:

The Telegraph-ի կողմից հարցված փորձագետները կարծում են, որ նման փոխանցումները կարող են շարունակվել և  այսօր՝ Իրանում զանգվածային բողոքի ցույցերի և Մոսկվայի ու Թեհրանի միջև ռազմական գործընկերության ֆոնին, որը ներառում է «Շահեդ» անօդաչու թռչող սարքերի և «Ֆաթահ-360» հրթիռների մատակարարումը Ուկրաինայում պատերազմի համար։

Ռուսաստանի կողմից Ուկրաինա ներխուժումից հետո «Պրոմսվյազբանկը» ենթարկվել է  Մեծ Բրիտանիայի և ԱՄՆ-ի կողմից կիրառվող արգելափակող պատժամիջոցների։

2024 թվականին բանկը հայտնվել է մոլդովացի փախստական ​​օլիգարխ Իլան Շորի հետ համատեղ գործարկված A7A5 կրիպտո թոքենի հետ կապված սկանդալի կենտրոնում։ Financial Times-ի տվյալներով՝ չորս ամսվա ընթացքում թոքենի հետ կապված Grinex բորսայի միջոցով անցել է մոտ 9.3 միլիարդ դոլար։ Բացի այդ՝ Մոլդովայի ընտրություններից առաջ ընտրողներին կաշառելու համար ПСБ -ի բջջային հավելվածի միջոցով երկիր է փոխանցվել ավելի քան 24 միլիոն դոլար։

Թարգմանությունը՝ Էմմա Չոբանյանի