28.10.2026 | 23:23
Քննարկվել են Լուվրի և Հայաստանի պատմության թանգարանի միջև համագործակցության հեռանկարները
TRIPP-ի ծախսերի մասին Քոչարյանի պնդումը հակասում է արդեն խոստացված ներդրումների ծավալին
Քաղաքականություն
30.01.2026 | 19:48
Երկրորդ նախագահ Ռոբերտ Քոչարյանն իր ասուլիսի ժամանակ մի քանի անգամ նվազեցրել է TRIPP նախագծի ներդրումների ծավալի մասին հայտնի տվյալները։ Նա նշել է, որ 42-43 կիլոմետր հատվածի վրա միլիարդավոր դոլարների ներդրումների դեպքում ճանապարհի ասֆալտը կամ երկաթուղու ռելսերը «պետք է ոսկուց լինեն»՝ ակնարկելով տվյալների ուռճացված լինելը։
«Ընդամենը 80-90 միլիոն դոլարի ներդրումային ծրագիր է, ընդամենը, որը Հայաստանը հանգիստ կարող է անել իր միջոցներով։ Կառավարության պահուստային ֆոնդի հաշվին միայն երկու տարում կարելի է ամբողջ TRIPP-ը ստանալ և վերջացնել», – նշել է Քոչարյանը։
2026 թվականի ՀՀ բյուջեի ընդունման ժամանակ կառավարության պահուստային ֆոնդին հատկացվել է 69 միլիարդ դրամ (մոտ 180 միլիոն դոլար)։ Եթե պահուստային ֆոնդից այլ ծախսեր չարվեին, ապա այն, իսկապես, կարող էր ծածկել Քոչարյանի նշած ծավալը նաև մեկ տարում։
Բայց կառավարության պահուստային ֆոնդից չեն կարող այլ ծախսեր չարվել, իսկ ներդրումների մասին Քոչարյանի նշած թիվը հակասում է մինչ այս հրապարակված թվերին։
Մասնավորապես, 2025-ի սեպտեմբերին ԱՄՆ պետքարտուղարության Եվրոպայի և Եվրասիայի բյուրոյի ղեկավար Բրենդան Հենրեհենի Երևան այցի ժամանակ նշվել է, որ ԱՄՆ-ն արդեն 145 միլիոն դոլար է հատկացնում նախնական աշխատանքների համար։
Իսկ ամբողջական ներդրումների ծավալի մասին հստակ հաշվարկներ չկան։ Ֆինանսների նախարար Վահե Հովհաննիսյանը հունվարի 21-ի իր ասուլիսին ասել է, որ մի քանի տարի առաջվա ընդհանուր գնահատումներ ունեն ապաշրջափակման և բացակայող ենթակառուցվածքների վերականգնման վերաբերյալ, և այդ գնահատման համաձայն անհրաժեշտ կլինի մոտ 500 միլիոն դոլար։
Գարիկ Հարությունյան
