30.01.2026 | 20:00
ՔՊ իշխանությունն իր ձախողումների մեջ ՌԴ-ին գտավ որպես մեղավոր․ Արմեն Խաչատրյան․ ՏԵՍԱՆՅՈՒԹ
Փետրվարի 1-ից հայ-թուրքական սահմանը կարող է մասնակի բացվել․ ինչ է հայտնի․ ՏԵՍԱՆՅՈՒԹ
Քաղաքականություն
30.01.2026 | 19:08
Factor TV-ի տեղեկություններով՝ հաջորդ ամսվա սկզբին Հայաստանի և Թուրքիայի միջև սահմանը կարող է բացվել 3-րդ երկրների քաղաքացիների և դիվանագիտական անձնագիր ունեցողների համար։
Դեռևս 2022 թվականի հուլիսի 1-ին Հայաստանի և Թուրքիայի հատուկ ներկայացուցիչները Վիեննայում պայմանավորվածություն էին ձեռք բերել՝ հնարավոր ամենասեղմ ժամկետում ապահովել Հայաստան-Թուրքիա ցամաքային սահմանը հատելու հնարավորություն 3-րդ երկրների քաղաքացիների համար։ 3,5 տարի անց Անկարան դեռևս գործնական քայլ չի արել։ 2025-ի վերջին խորհրդանշական քայլի հավանականության մասին էր ակնարկել Թուրքիայի նախագահը, իսկ մի քանի օր առաջ ԵԽԽՎ նստաշրջանում թեմային անդրադարձել է ՀՀ ԱԳ նախարար Արարատ Միրզոյանը։
«Հայաստանը լիովին հավատարիմ է Թուրքիայի հետ հարաբերությունների լիարժեք կարգավորմանը։ Հայաստանի և Թուրքիայի միջև հարաբերությունների կարգավորման գործընթացում շարունակական առաջընթացը, այդ թվում՝ սահմանի լիարժեք բացումը, դիվանագիտական հարաբերությունների հաստատումը և Գյումրի-Կարս երկաթուղու վերագործարկումը, կարևոր ներդրում կլինեն տարածաշրջանային կայունության և բարեկեցության ամրապնդման գործում»,- նշել է Միրզոյանը։
Դեկտեմբերի 29-ին գործադիրը որոշեց Թուրքիայի հատուկ և ծառայողական անձնագիր ունեցող քաղաքացիների՝ Հայաստան այցելության մուտքի արտոնագրի տրամադրումն անվճար դարձնել։ Հարցը Կառավարությունը հապճեպ էր ընդունել։ Մեկ օրվա ընթացքում նախագիծը ներկայացվեց և հաստատվեց գրավոր ընթացակարգով։
«Թուրքիայի հետ պայմանավորվածություն է ձեռք բերվել, որ փոխադարձության սկզբունքով 2026 թվականի հունվարի 1-ից Հայաստանն ու Թուրքիան E-Visa համակարգով առանց պետտուրքի՝ անվճար, Հայաստան և Թուրքիա մուտք գործելու համար անհրաժեշտ արտոնագիր ստանալու հնարավորություն են ստեղծելու ՀՀ և Թուրքիայի դիվանագիտական, ծառայողական և հատուկ անձնագրեր ունեցող անձանց համար»,- նշվում է հիմնավորման մեջ։
«Հայ-թուրքական երկխոսության վերջնանպատակը 2 երկրների միջև դիվանագիտական հարաբերությունների հաստատումն է, այնուհետև՝ սահմանի ամբողջական բացումըց,- ասել է Միրզոյանը։
Հունվարի 14-ին Թուրքիայի պետական Anadolu գործակալությունը գրեց, որ հայ-թուրքական սահմանին գտնվող Թուրքիայի «Ալիջան» սահմանային անցակետում իրականացվող աշխատանքների 90%-ն ավարտված է: Նշվում է, որ մաքսային և այլ ընթացակարգերի համար նախատեսված շենքերի կառուցմանը զուգընթաց՝ տեղադրվում են նաև գովազդային վահանակներ և ցուցանակներ:
Շեշտվում էր՝ այսպիսով փորձ է արվում խրախուսել Հայաստանից Թուրքիա ժամանողներին ուսումնասիրել Իգդիրը և դրա շրջակայքը։
Մարգարայի անցակետից մի տեսանյութ էլ ՀՀ կառավարության մամուլի ծառայությունը հրապարակեց հունվարի 26-ին։ Անցակետ էին այցելել պետական տարբեր գերատեսչությունների ներկայացուցիչներ։ Այն պատրաստ է շահագործման դեռևս 2023-ի վերջից։
Մանրամասները՝ տեսանյութում։
Եվգենյա Համբարձումյան
