Քաղաքականություն
30.01.2026 | 10:37
Հայաստանի հարկադիր մերձեցումը Եվրամիության հետ բացասական հետևանքներ կունենա ինչպես Ռուսաստանի հետ նրա դաշնակցային հարաբերությունների, այնպես էլ հետխորհրդային տարածքում ինտեգրացիոն գործընթացների զարգացման համար։ ՏԱՍՍ-ին տված հարցազրույցում այս մասին հայտարարել է ՌԴ արտաքին գործերի նախարարության Եվրոպական հարցերի դեպարտամենտի տնօրեն Վլադիսլավ Մասլեննիկովը։
Մեկնաբանելով Եվրամիությանը միանալու՝ Երևանի մտադրությունը՝ նա նշել է, թե հաշվի առնելով ԵՄ-ի արագ վերափոխումը ագրեսիվ ռազմաքաղաքական դաշինքի և Ռուսաստանի հետ առճակատմանը ուղղված նրա ռազմավարական կուրսը, «այս կազմակերպությանը անդամակցելու Հայաստանի հետաքրքրությունը չի կարող չմտահոգել»։
«Մենք հույս ունենք, որ Հայաստանը՝ որպես Եվրասիական տնտեսական միության անդամ պետություն, գիտակցում է Բրյուսելի հետ հարկադիր մերձեցման հնարավոր բացասական հետևանքները, ինչպես մեր դաշնակցային հարաբերությունների, այնպես էլ հետխորհրդային տարածքում ինտեգրացիոն գործընթացների զարգացման համար»,- ընդգծել է Մասլեննիկովը։
Միաժամանակ, նա նշել է, որ Ռուսաստանը հարգում է այլ պետությունների ինքնիշխան իրավունքը՝ մասնակցելու ինտեգրացիոն միավորումներին, հատկապես «նրանց ցանկությունը՝ լրացուցիչ հնարավորություններ ստանալու տնտեսական զարգացման և սեփական բնակչության բարեկեցությունը բարելավելու համար», սակայն Հայաստանի ղեկավարությունը «ոչ երկիմաստ ազդարարել է իր շահագրգռվածությունը Եվրամիության հետ առավելագույն մերձեցման մասին»։
«Այս ջանքերին համապատասխան՝ 2025 թվականի ապրիլին երկրի նախագահ Վահագն Խաչատուրյանը ստորագրել է «ՀՀ-ի Եվրոպական Միությանը անդամակցության գործընթացի մեկնարկի մասին» օրենքը, որը նախկինում հաստատվել էր խորհրդարանի կողմից»,- հիշեցրել է նա։
Ըստ Մասլեննիկովի՝ Բրյուսելն արդեն սկսել է «ակտիվորեն մղել Երևանին՝ ԵՄ չափանիշներին քաղաքականապես մոտիվացված անցում կատարելու, որը հիմնարար կերպով անտեսում է այս անդրկովկասյան հանրապետության անդամակցությունը ԵՏՄ-ին և դրա հետ կապված պարտավորությունները»։
«Փաստը մնում է, որ ԵՏՄ-ին և ԵՄ-ին միաժամանակյա անդամակցությունն անհնար է»,- հայտարարել է ՌԴ ԱԳՆ պաշտոնյան։
Թարգմանությունը՝ Էմմա Չոբանյանի
