«ՀԱՊԿ-ում Բելառուսի ներկայացուցչի ընտրությունը նվաստացուցիչ կլինի Հայաստանի համար»․ Ստեփան Գրիգորյան. ՏԵՍԱՆՅՈՒԹ

«Գլոբալիզացիայի և տարածաշրջանային զարգացման կենտրոնի» ղեկավար, 1996-99 թթ. ՀԱՊԿ-ում ՀՀ ներկայացուցիչ Ստեփան Գրիգորյանը Factor.am-ի հետ զրույցում սխալ մարտավարության պատճառով արձանագրված պարտություն է անվանում ՀԱՊԿ գագաթաժողովի արդյունքը, որտեղ Հայաստանի ներկայացուցիչը ոչ միայն չընտրվեց ՀԱՊԿ գլխավոր քարտուղարի պաշտոնում, այլև Ուզբեկստանի նախագահ Նուրսուլթան Նազարբաևը հայտարարեց, թե ՀԱՊԿ բոլոր պետությունների ղեկավարները ցանկանում են այդ պաշտոնում տեսնել Բելառուսի ներկայացուցչին։

«Սխալ էր գնալ, նոր թեկնածու ներկայացնելը։ Պետք էր նախ սկզբունքները ֆիքսել՝ ինչ սկզբունքներով պետք է շարժվել ֆորսմաժորային իրավիճակում»,- ասաց քաղաքագետը՝ հավելելով, թե պետք էր հստակեցնել՝ ցանկացած պետության պարագայում, եթե ներկայացուցիչը հետ է կանչվում, պաշտոնը մնո՞ւմ է պետությանը։

«Կոպիտ ասած՝ մենք պարտվեցինք, չկարողացանք մեր ուզածն անցկացնել։ Դա սխալ ընտրված մարտավարության արդյունք էր»,- նշեց քաղաքագետը՝ հավելելով, որ Հայաստանից չի լինի ՀԱՊԿ քարտուղարը։

«Շատ հավանական է, որ կմնա Ռուսաստանի ներկայացուցիչը էլի 1 տարով, մինչև հերթը գա Բելառուսին։ Բելառուսի ներկայացուցչի ընտրության դեպքում լիակատար պարտություն կլինի, քանի որ Բելառուսի ներկայացուցչի ընտրությունը կնշանակի մենք մյուսներին հավասար չենք այդ կազմակերպությունում։ Մեր 1 տարին կամ 1,2 տարին տալիս են այդ երկրին։ Դա նսեմացուցիչ կլինի մեզ համար»,- նկատեց Գրիգորյանը։

Ուստի, նրա խոսքով, եթե գիտես, որ կպարտվես, չպետք է պայքարի մեջ մտնել։ «Հիմա մեզ ցույց կտան մեր տեղը, ցույց կտան, որ մենք այնքան էլ հավասար չենք այդ կազմակերպությունում, որ էդ կազմակերպությունում 3 մակարդակի պետություններ կան՝ Ռուսաստանը՝ որպես գերտերություն, միջուկային զենք ունեցող, Բելառուսն ու Ղազախստանը, հետո Հայաստանը կամ Տաջիկստանը»,- կանխատեսում արեց քաղաքագետը։

ՀԱՊԿ-ում Հայաստանի նախկին ներկայացուցիչը անընդունելի ու խիստ վտանգավոր համարեց, որ Հայաստանը կողմ է քվեարկել ՀԱՊԿ-ում դիտորդ և համագործակցող պետություններ ներգրավելու նախագծին, քանի որ նրա խոսքով, Ադրբեջանն այդպիսով հնարավորություն է ստանում ներգրավվել այդ կազմակերպությունում։

«Հայաստանը պետք է թույլ չտար, որ դա անցներ»,- շեշտեց Գրիգորյանը։

Քաղաքագետի համար տարակուսելի է նաև, որ ՀԱՊԿ գագաթաժողովում անդամ պետությունները հայտարարություն են ընդունել, թե ողջունում են Ռուսաստանի և Ղազախստանի ջանքները Սիրիայի հարցում, որում, սակայն, ոչ մի խոսք չկա Սիրիայում Հայաստանի ջանքների մասին։

Մանրամասները դիտեք Ստեփան Գրիգորյանի հետ Factor.am-ի հարցազրույցում։

Մարինե Խառատյան