18.10.2026 | 20:17
«Մեր նպատակը նոր խոստումներ տալը չէ, այլ ստանձնած պարտավորությունները կատարելը»․ Մաթևոսյան․ ՏԵՍԱՆՅՈւԹ
Մելբուրնի միջադեպը ոստիկանությունն ահաբեկչություն է որակել
Քաղաքականություն
09.11.2018 | 20:10
Մելբուրնի կենտրոնում իրականացված հարձակումն իրավապահներն ահաբեկչություն են որակել: Ավստրալական Վիկտորիա նահանգի ոստիկանության գլխավոր կոմիսար Գրեմ Էշթոնի փոխանցմամբ՝ իրավապահները տեղեկություն ունեն, որ հարձակվողը պայթուցիկ սարք է նետել ավտոմեքենայի պատուհանից ներս, ինչի արդյունքում մեքենան քաղաքի կենտրոնում պայթել է, գրում է ՏԱՍՍ-ը:
«Մենք վկա ունենք, որը տեսել է՝ ինչպես է հարձակվողը պայթուցիկ սարք նետել մեքենայի պատուհանից: Մենք հանցագործությունը կարող ենք ահաբեկչություն որակել»,- ասել է ոստիկանության պաշտոնյան:
Նշենք, որ Մելբուրնի կենտրոնում ավտոմեքենան մխրճվել է առևտրի կենտրոնի շենքի մեջ ու հրդեհվել: Դեպքի վայր ժամանած իրավապահների վրա դանակով զինված տղամարդ է հարձակվել՝ «Ալլահ աքբար» բղավելով: Հարձակման հետևանքով երեք անցորդ է տուժել, որոնցից մեկն ավելի ուշ մահացել է: Հարձակվողը ոստիկանների կրակոցից հրազենային վնասվածք է ստացել և հիվանդանոցում մահացել:
Մելբուրնում անվտանգության ուժեղացված միջոցներ են ձեռնարկվել, միջադեպի և հարակից շրջաններում սակրավորներ են աշխատում: Հետաքննությունը շարունակվում է:
Նշվում է, որ ենթադրյալ ահաբեկիչը Սոմալիից Ավստրալիա է փոխադրվել 1990-ական թվականներին: Reuters-ի փոխանցմամբ՝ կատարվածի պատասխանատվությունը ստանձնել է «Իսլամական պետություն» ահաբեկչական խմբավորումը:
