22.04.2026 | 23:30
ՀՀ տարածքում ավտոճանապարհները հիմնականում անցանելի են
UCOM-ը դադարեցնում է համագործակցությունը վճարահաշվարկային կազմակերպությունների հետ
29.01.2026 | 11:13
UCOM ծառայությունների դիմաց վճարումները փետրվարի 2-ից հասանելի չեն լինի «Իդրամ», «Իզի Փեյ» և «Թել-Սել» վճարահաշվարկային կազմակերպությունների միջոցով։ Վճարումներ չեն իրականացվի նշված կազմակերպությունների վճարային համակարգերով, վճարային տերմինալներով, օնլայն դրամապանակներով և մասնաճյուղերում։ Այս մասին հայտարարություն է տարածել UCOM ընկերությունը։
«Որոշման հիմքում գործընկերների հետ ծառայությունների մատուցման պայմանների շուրջ անհամաձայնությունն է: UCOM ծառայությունների դիմաց վճարումների մյուս տարբերակները շարունակում են գործել անխափան»,- ասված է հաղորդագրության մեջ:
Ընկերությունն առաջարկում է վճարումներն իրականացնել UCOM-ի կայքով և հավելվածներով, ընկերության վաճառքի և սպասարկման կենտրոններում գործընկեր բանկերի հավելվածներով, տերմինալներով ու մասնաճյուղերում, «ՄոբիԴրամ»-ի հավելվածով և վճարային տերմինալներով, «Միփեյ» հավելվածով և «Հայփոստ»-ի բաժանմունքներում։
Ավելի վաղ Viva Armenia և Team Telecom Armenia ընկերությունները հայտնել էին նույն վճարահաշվարկային ընկերությունների հետ փետրվարի 1-ից համագործակցությունը դադարեցնելու մասին։ Viva-ն հայտնել էր, որ այդ կազմակերպությունների հետ հնարավոր չի եղել փոխշահավետ պայմաններով համագործակցության գալ: Team-ը պատճառներ չէր նշել, իսկ թեմայի վերաբերյալ մեր հարցմանը դեռևս չի պատասխանել։
«Թել-Սել» ընկերությունից Factor.am-ի հետ զրույցում հայտնել էին, որ Viva Armenia և Team Telecom Armenia ընկերությունների կողմից առաջարկված համագործակցության նոր պայմանները չեն բխում փոխշահավետության տրամաբանությունից և կրում են միակողմանի բնույթ։
Անի Թամրազյան
