03.08.2026 | 23:30
Տաթև-Լծեն ավտոճանապարհին բեռնատարը դուրս է եկել երթևեկելի հատվածից և բախվել հողաթմբին
Viva-ն ու Team-ը հրաժարվում են հայտնի վճարային հարթակներից․ բաժանորդները դժգոհ են․ ՏԵՍԱՆՅՈՒԹ
Տնտեսություն
27.01.2026 | 20:30
«Իդրամ», «Իզի փեյ», «Թել-Սել» և «Ֆասթ Շիֆթ» հարթակներում փետրվարի 1-ից հասանելի չեն լինի հայաստանյան ամենախոշոր օպերատորներից երկուսի՝ «Վիվա Արմենիա»-ի և Team Telecom Armenia-ի ծառայությունների դիմաց վճարումները։ Բջջային օպերատորների կողմից այս ծանուցումը բաժանորդների մոտ դժգոհություն է առաջացրել։
Վճարահաշվարկային կազմակերպությունների հետ համագործակցությունը խզելու մասին առաջինը հայտարարեց «Վիվա Արմենիա»-ն։
«Վերը նշված ընկերությունների հետ, ցավոք, հնարավոր չեղավ գալ համաձայնության՝ փոխշահավետ պայմաններով համագործակցության շուրջ: Փոխշահավետ պայմաններով համագործակցությունը հնարավոր է դարձել ՀՀ բանկերի ու ՀայՓոստ-ի, ինչպես նաեւ՝ MobiDram, Upay ու TeamPay հարթակների/բջջային հավելվածների հետ»,- հայտնել է ընկերությունը։
Ավելի ուշ այդ կազմակերպությունները տեղեկացրին, որ համագործակցությունը միակողմանի է լուծվել։ Մասնավորապես, «Իզի Փեյ»-ը հայտնել է, որ տեղի ունեցածը «Իզի Փեյ» ընկերության նախաձեռնությունը կամ որոշումը չէ և պայմանավորված է «Վիվա Արմենիա» ՓԲԸ-ի կողմից առաջարկված համագործակցության նոր և ոչ հիմնավոր սակագնային պայմաններով։
«Նշված պայմանները տվյալ պահին չեն ապահովում ծառայությունների շարունակական և արդյունավետ մատուցման տնտեսական/բիզնես հնարավորությունը վճարային համակարգի կողմից»,- գրել է կազմակերպությունը։
Դրանից հետո Team Telecom Armenia-ն հայտնեց նույն փոփոխության մասին, թեև վճարահաշվարկային կազմակերպությունները համագործակցության դադարեցման մասին հայտարարություն չտարածեցին։ Factor.am-ը հարցում է ուղարկել Team-ին՝ պարզելու, թե որն է համագործակցությունը դադարեցնելու պատճառը։ Ընկերությունից պատճառաբանեցին, որ ոչ աշխատանքային օրով պայմանավորված այս պահին չեն կարող պատասխանել։
Factor TV-ն հարցումներ է ուղարկել ընկերություններին, պատասխանները կհրապարակենք ստանալուն պես։
Մանրամասները՝ տեսանյութում։
Անի Թամրազյան
