Հնդկաստանն ու ԵՄ-ն ստորագրել են ազատ առևտրի համաձայնագիրը. ՏԵՍԱՆՅՈՒԹ

Հնդկաստանն ու Եվրամիությունը ստորագրել են «նշանակալի» ազատ առևտրի համաձայնագիրը։ Հնդկաստանի վարչապետ Նարենդրա Մոդին այս մասին հայտարարել է հունվարի 27-ին «Հնդկաստանի էներգետիկայի շաբաթ»-ում իր ելույթի ժամանակ։ Մոդիի խոսքով՝ ԵՄ-ի հետ համաձայնագիրը, որը կազմում է համաշխարհային ՀՆԱ-ի մոտ 25%-ը և ընդհանուր համաշխարհային առևտրի մոտ մեկ երրորդը, կլրացնի Հնդկաստանի գործող համաձայնագրերը Միացյալ Թագավորության և Եվրոպական ազատ առևտրի ասոցիացիայի հետ, գրում է The Insider-ը։

«Շնորհավորում եմ մեր գործընկերներին, որոնք ներգրավված են այնպիսի ոլորտներում, ինչպիսիք են տեքստիլը, ոսկերչական իրերը, կաշին և կոշիկը: Այս գործարքը զգալի աջակցություն կցուցաբերի այս ոլորտներին»,- ասել է Հնդկաստանի վարչապետը:

Financial Times-ը հաղորդում է, որ գործարքը կնքվել է Եվրահանձնաժողովի նախագահ Ուրսուլա ֆոն դեր Լեյենի և Եվրախորհրդի նախագահ Անտոնիո Կոշտայի՝ Հնդկաստան կատարած այցի ժամանակ։ ԵՄ-ն հայտարարել է, որ գործարքը «կբացի շուկաները, կվերացնի խոչընդոտները և կամրապնդի մաքուր տեխնոլոգիաների, դեղագործության և կիսահաղորդիչների կարևորագույն մատակարարման շղթաները»։ Համաձայնագիրը պետք է հաստատվի Եվրախորհրդարանի և Հնդկաստանի կառավարության կողմից։

Անանուն եվրոպացի պաշտոնյան FT-ին ասել է, որ ԵՄ-ն ձգտում է «երկու կողմերից էլ  մաքսատուրքերի զգալի  կրճատումների»։

Հնդկաստանն այժմ 100% մաքսատուրքեր է սահմանում մի շարք կարևոր եվրոպական արտահանման ապրանքների վրա, ինչպիսիք են մեքենաները, ալկոհոլային խմիչքները և որոշ մսամթերք։ Եվրոպական հանձնաժողովի տվյալներով՝ Հնդկաստանի և ԵՄ-ի միջև առևտուրը 2024 թվականին կգերազանցի 120 միլիարդ եվրոն։ Հնդկաստանը ԵՄ է արտահանում արդյունաբերական սարքավորումներ, քիմիական նյութեր, գունավոր մետաղներ և տեքստիլ նյութեր։

Օգոստոսին Թրամփը 50 տոկոս մաքսատուրք սահմանեց հնդկական ապրանքների վրա, և այդ ժամանակից ի վեր Նյու Դելին փնտրում է այլընտրանքային շուկաներ իր արտահանման համար։ Այս ընթացքում Հնդկաստանը առևտրային համաձայնագրեր է կնքել Մեծ Բրիտանիայի, Օմանի և Նոր Զելանդիայի հետ։

Թարգմանությունը՝ Էմմա Չոբանյանի