Նարեկ Կարապետյանը հրաժարվել է զինծառայությունից ազատվելու պատճառ դարձած առողջական խնդրի կապակցությամբ հետազոտություններ անցնել․ ՔԿ

«Մեր ձևով» շարժման համակարգող Նարեկ Կարապետյանի կողմից պարտադիր զինվորական ծառայությունից խուսափելու ենթադրյալ դեպքի առթիվ քրեական վարույթ կա՞, թե՞ ոչ։ Քննչական կոմիտե ուղարկված գրավոր հարցմամբ Factor.am-ը փորձել է ստանալ այս հարցի պատասխանը, ինչպես նաև պարզել, թե վարույթի առկայության դեպքում Կարապետյանն ի՞նչ կարգավիճակ ունի։

Ի պատասխան՝ Քննչական կոմիտեից հայտնել են.

«Քննչական կոմիտեի զինվորական քննչական գլխավոր վարչության հատկապես կարևոր գործերի քննության վարչությունում 2003թ. ապրիլի 18-ին ընդունված ՀՀ քրեական օրենսգրքի 327-րդ հոդվածի 2-րդ մասի 2-րդ կետով (համապատասխանում է գործող ՀՀ քրեական օրենսգրքի 461-րդ հոդվածի 2-րդ մասի 2-րդ կետին) և 38-327-րդ հոդվածի 2-րդ մասի 2-րդ կետով (համապատասխանում է գործող ՀՀ քրեական օրենսգրքի 46-461-րդ հոդվածի 2-րդ մասի 2-րդ կետին) նախաձեռնված քրեական վարույթի նախաքննությամբ պարզվել է, որ կենտրոնական բժշկական հանձնաժողովի եզրակացությամբ Նարեկ Կարենի Կարապետյանը ճանաչվել է ոչ պիտանի խաղաղ ժամանակ զինվորական ծառայության համար, պիտանի է զինվորական ծառայության համար սահմանափակումով՝ պատերազմական ժամանակ և «Զինապահության մասին» ՀՀ օրենքի 15-րդ հոդվածի 2-րդ կետի հիմքով հաշվառվել է պահեստազորում:

Նարեկ Կարապետյանի՝ հնարավոր առողջական խնդիրների հետ կապված մի շարք հանգամանքներ պարզելու նպատակով քրեական վարույթով նշանակվել է հանձնաժողովային դատաբժշկական փորձաքննություն, որի շրջանակում վերջինս ներկայացել է փորձագետներին, սակայն հրաժարվել է պարտադիր ժամկետային զինվորական ծառայությունից ազատվելու համար նախկինում պատճառ դարձած առողջական խնդրի կապակցությամբ հետազոտություններ անցնելուց»։
Կոմիտեից հայտնում են նաև, որ քրեական վարույթի նախաքննությունը շարունակվում է, սակայն մեր մյուս հարցերի հետ կապված տեղեկությունները հրապարակման ենթակա չեն։
Արաքս Մամուլյան