14.03.2026 | 12:34
Մեր դե՞մ եք քվեարկելու, ասում են` ՌԴ-ի հայերը մեր դեմ են քվեարկելու. Փաշինյանը Սիսիան է գնացել․ ՏԵՍԱՆՅՈՒԹ
Ավարտվել է Ուկրաինայի, Ռուսաստանի և Միացյալ Նահանգների միջև բանակցությունների առաջին փուլը
Քաղաքականություն
24.01.2026 | 14:17
Աբու Դաբիում ավարտվել է Ուկրաինայի, Ռուսաստանի և Միացյալ Նահանգների միջև Ուկրաինայում պատերազմը դադարեցնելու ԱՄՆ ծրագրի շուրջ ուղիղ բանակցությունների առաջին փուլը։ Բանակցությունները «այսօր ավարտված են», հայտարարել է Ուկրաինայի նախագահի աշխատակազմը ուրբաթ՝ հունվարի 23-ի երեկոյան․ գրում է DW-ի ռուսական ծառայությունը։
Աբու Դաբիում կայացած առաջին հանդիպման թեման «որոշիչ գործոններն» էին, որոնք կարող են ավարտել պատերազմը, հայտարարել է Ուկրաինայի գլխավոր բանակցող Ռուստեմ Ումերովը։ Ավելին, քննարկվել է «բանակցային գործընթացի հետագա տրամաբանությունը»։
Ումերովի խոսքով՝ հունվարի 24-ին նախատեսված են լրացուցիչ հանդիպումներ։ Երեք երկրների ներկայացուցիչները խորհրդակցություններ են անցկացնում ԱՄՆ խաղաղության ծրագրի շուրջ՝ Ռուսաստանի կողմից իր հարևանի դեմ սանձազերծված պատերազմի սկզբից ի վեր առաջին անգամ։
Բանակցությունների սկսվելուց կարճ ժամանակ առաջ Մոսկվան վերահաստատել է իր առավելագույն պահանջը՝ ուկրաինական բանակը դուրս բերել ամբողջ Դոնբասից, այդ թվում՝ նախկինում Ռուսաստանի կողմից չվերահսկվող տարածքներից։ Ուկրաինան կտրականապես հրաժարվում է դա անել, հաղորդում է AFP լրատվական գործակալությունը։
Ավելի վաղ հայտնել էինք, որ սկզբնապես Աբու Դաբիում Ռուսաստանի և Ուկրաինայի հետախուզական ծառայությունների միջև բանակցություններ էին նախատեսված «այլ թեմայով» (հավանաբար՝ ոչ ուղղակիորեն կապված խաղաղության կարգավորման հետ), սակայն ԱՄՆ նախագահի հատուկ բանագնաց Դեն Դրիսկոլի անսպասելի ժամանումը փոխել է իրավիճակը։
Թարգմանությունը՝ Անահիտ Խաչատրյանի
