Հայտնաբերվել են կեղծ վարորդական վկայականով երթևեկող վարորդներ

ՀՀ ներքին գործերի նախարարությունից հայտնում են, որ Արմավիրի մարզի պարեկները հայտնաբերել են կեղծ վարորդական վկայականով երթևեկող վարորդների։

«Հունվարի 2-ին Արմավիր-Երևան ավտոճանապարհին ծառայող Արմավիրի մարզի պարեկները ստուգման նպատակով կանգնեցրել են «Օպել» մակնիշի մի մեքենա։ Սուգմամբ պարզել է, որ Արմավիր քաղաքի բնակիչ 26-ամյա վարորդի ներկայացրած վարորդական իրավունքի վկայականը կեղծ է։

Նման մի դեպք էլ Արմավիրի մարզի պարեկներն արձանագրել են հունվարի 9-ին։ Արմավիր-Երևան ճանապարհին նրանք կանգնեցրել են մի «ԲՄՎ», որի վարորդ Նոր Կեսարիա գյուղի 24-ամյա բնակիչը ներկայացրել է միջազգային վարորդական իրավունքի կեղծ վկայական։ Ըստ վարորդի՝ վկայականը նա ձեռք է բերել Տելեգրամյան կայքէջի միջոցով։

Հաջորդ դեպքը Արմավիրի պարեկները հայտնաբերել են հունվարի 14-ին։ Զարթոնք գյուղում նրանք կանգնեցրել են առանց ԱՊՊԱ պայմանագրի շահագործվող «Օպել» մակնիշի մեքենա։ Եղեգնուտ գյուղի բնակիչ 31-ամյա վարորդը ներկայացրել է վարորդական իրավունքի կեղծ վկայական։

Հունվարի 19-ին Արմավիրի մարզի պարեկներն արձանագրել են նմանատիպ խախտման երեք դեպք։ Այդ դեպքերում վարորդները հայտնել են, որ կեղծ վկայականները ձեռք են բերել Տելեգրամյան կայքէջի միջոցով։
Հունվարի 20-ի գիշերը Արմավիրի պարեկները կանգնեցրել են «ԲՄՎ» մակնիշի մեքենա, որի վարորդ Ակնալիճի 28-ամյա բնակիչը ներկայացրել է վարորդական իրավունքի կեղծ վկայական։

Բոլոր դեպքերով կազմված փաստաթղթերն ուղարկվել են Արմավիրի մարզային քննչական վարչություն։ Հանգամանքները պարզվում են»,- ասված է հաղորդագրությունում։