06.09.2026 | 17:20
Արարատ Միրզոյանը Ռիգայում կհանդիպի Լատվիայի ԱԳ նախարարին
50 հորատող գործադուլ է անում, ընկերությունը՝ նոր աշխատողներ փնտրում․ ինչ է կատարվում Ախթալայի լեռնահարստացման կոմբինատում
Հասարակություն
22.01.2026 | 16:39
Ախթալայի և Շամլուղի հանքերի մոտ 50 հորատողներ շուրջ մեկ շաբաթ է՝ գործադուլ են անում։ Համայնքային համախմբման և աջակցության կենտրոն» ՀԿ-ի նախագահ Օլեգ Դուլգարյանը Factor.am-ի հետ զրույցում տեղեկացրեց, որ Ախթալայի լեռնահարստացման կոմբինատի աշխատակիցները պահանջ են ներկայացրել առաջին հերթին աշխատավարձերի բարձրացման վերաբերյալ:
«Խոսքը 20% բարձրացման մասին էր, քանի որ համարում են, որ իրենց կատարած աշխատանքի ծանրությունը, վտանգները չեն համապատասխանում ստացված եկամուտին։ Նրանք խոսում էին նաև անվտանգային պայմաններից»,- ասաց Դուլգարյանը։
Նրա խոսքով՝ աշխատողները մի քանի օր բանակցել են, սակայն բանակցություններն արդյունք չեն տվել:
«Մոտ 40-50 մարդ հավաքվում է ընկերության դարպասների մոտ և սպասում են իրենց պահանջների իրականացմանը: Այսինքն, այլ գործողություններ չեն իրականացնում: Երեկ գործադուլ անողներն ասել են՝ լավ, գոնե այնքանով բարձրացրեք հիմա, որքանով որ դա հնարավոր է կարճաժամկետ կտրվածքում, իսկ երկարաժամկետ կտրվածքում, այսինքն՝ լինեն ծրագրեր, պայմանավորվածություններ, որ աշխատավարձերը կբարձրանան: Սակայն դա չի ընդունվել: Իրենց ասել են, որ ընկերությունը ունի որոշակի ֆինանսական դժվարություններ և այս պահին չի կարող նման գործարքի գնալ»,- նշեց իրավապաշտպանը:
Նրա խոսքով՝ գործադուլ անողներից ոմանք արդեն ստացել են աշխատանքից հեռացման ծանուցումներ։ Այդ ֆոնին Ախթալայի լեռնահարստացման կոմբինատը ֆեյսբուքյան հայտարարությամբ նոր հորատողներ է փնտրում ստորգետնյա հանքում աշխատանքի համար՝ խոստանալով կայուն աշխատանք և մրցունակ աշխատավարձ։ Դուլգարյանը կարծում է, որ սա կարող է վկայել սպասվող կրճատումների մասին, և կոմբինատը, դժվար թե, աշխատավարձերի բարձրացում անի։
«Մի կողմից, իրավական առումով, գործատուն իրավունք ունի նման մոտեցում ցույց տալ: Բայց սոցիալական արդարության առումով, որքանո՞վ են այդ մարդիկ լսելի եղել, իրենք ունեցե՞լ են ինստիտուտներ, որոնք պետք է իրենց իրավունքներից խոսեին։ Միանշանակ, իրենց ազատումը աշխատանքից խնդրահարույց է, և վստահ եմ, որ նրանցից ոմանք միգուցե նաև իրենց իրավունքները պաշտպանեն դատարանում»,- ասաց Օլեգ Դուլգարյանը։
Մեզ չհաջողվեց կապ հաստատել ո՛չ Ախթալայի լեռնահարստացման կոմբինատի, ո՛չ վարչական շրջանի ղեկավարի գրասենյակի հետ․ մեր զանգերն անպատասխան մնացին։ Ախթալայի վարչական ղեկավար Սևակ Սարգսյանը երեկ «Ազատությանը» հայտնել էր, որ Լոռու մարզպետն ու Ալավերդու համայնքապետը հանդիպել են «Ախթալայի լեռնահարստացման կոմբինատ» ՓԲԸ ղեկավարության հետ՝ վերջին օրերին գործադուլ հայտարարած մոտ 50 աշխատողների պահանջները քննարկելու համար:
Անի Թամրազյան
