Թրամփը Դավոսում հիմնել է իր կողմից ղեկավարվող Խաղաղության խորհուրդը

Դավոսում կայացած Համաշխարհային տնտեսական ֆորումի շրջանակում ԱՄՆ նախագահ Դոնալդ Թրամփը պաշտոնապես հայտարարել է Խաղաղության խորհրդի ստեղծման մասին և կոչ արել ավելի շատ երկրների միանալ նախաձեռնությանը: Նա  ստորագրել է Խաղաղության խորհրդի հիմնադիր փաստաթուղթը, որը, քննադատների կարծիքով, խաթարում է Միավորված Ազգերի Կազմակերպության (ՄԱԿ) հեղինակությունը, գրում է DW-ի ռուսական ծառայությունը։

«Կանոնադրությունը պաշտոնապես ուժի մեջ է մտել, և Խաղաղության խորհուրդն այժմ պաշտոնապես հաստատված միջազգային կազմակերպություն է»,- ասել է Սպիտակ տան մամուլի քարտուղար Քերոլայն Լիվիթը։

Փաստաթղթի տորագրմանը մասնակցել են 19 երկրների ղեկավարներ, այդ թվում՝ Հայաստանի, Ադրբեջանի, Ղազախստանի, Ուզբեկստանի, Պակիստանի, Ինդոնեզիայի և Հունգարիայի ղեկավարները։ Թրամփի նախաձեռնած Խորհրդին միանալու համաձայնություն տված մի քանի երկրների ղեկավարներ, օրինակ՝ Բելառուսի ղեկավար Ալեքսանդր Լուկաշենկոն, ներկա չեն եղել։

Բացման խոսքում Դոնալդ Թրամփը հայտարարել է, որ նոր կազմակերպությունը կհամագործակցի ՄԱԿ-ի հետ։ Նա նաև թվարկել է Մերձավոր Արևելքի և ամբողջ աշխարհի արտաքին քաղաքականության կարևոր հարցերը, որոնք կլուծվեն իր նախաձեռնությամբ։ Հիմնական ոլորտներից մեկը կլինի Գազայի հատվածում հակամարտության կարգավորման ջանքերը։ Այնուամենայնիվ, Սպիտակ տան ղեկավարն ընդգծել է, որ Խորհուրդը չի ձգտի փոխարինել ՄԱԿ-ին գլոբալ խնդիրների լուծման գործում։

Նա հրավիրել է տասնյակ այլ համաշխարհային առաջնորդների՝ միանալ Խաղաղության խորհրդին։

«Այս Խորհուրդն ունի բոլոր ներուժը՝ դառնալու երբևէ ստեղծված ամենակարևոր մարմիններից մեկը»,- ասել է Թրամփը, որը գլխավորելու է իր իսկ հիմնադրած կազմակերպությունը։

1 միլիարդ դոլար ներդրում կատարող երկրները կարող են մշտական ​​անդամակցություն ստանալ Խորհրդում, մինչդեռ մյուսները կազմակերպությունում կլինեն սահմանափակ ժամանակով։ Վաշինգտոնի արևմտյան դաշնակիցներից քչերն են ընդունել նոր մարմնին միանալու հրավերը․ Հունգարիան դարձել է ԵՄ միակ անդամը, որը դա արել է։

Թրամփի հրավերն ընդունած երկրների թվում են Ալբանիան, Արգենտինան, Բելառուսը, Եգիպտոսը, Իսրայելը, Մարոկկոն, Պակիստանը, Կատարը, Սաուդյան Արաբիան, Թուրքիան, Արաբական Միացյալ Էմիրությունները և Վիետնամը։

Ըստ Reuters-ի՝ «շուրջ 35 երկիր» արդեն համաձայնել է միանալ Խաղաղության խորհրդին, հրավերներ են ուղարկվել մոտ 60 պետությունների ղեկավարների, այդ թվում՝ Ռուսաստանին, Բելառուսին և Չինաստանին: Նրանցից ոմանք տատանվում են մերժել Թրամփի առաջարկը՝ վախենալով նրա հետ հարաբերությունները փչացնելուց, հաղորդում է գործակալությունը Համաշխարհային տնտեսական ֆորումի շրջանակում Լատինական Ամերիկայի, Մերձավոր Արևելքի ու Եվրոպայի 16 քաղաքական գործիչների և պատվիրակների հետ զրուցելուց հետո։

«Մի քանի տարածաշրջանների պաշտոնյաներ մասնավոր զրույցներում ասել են, որ Թրամփի Խաղաղության խորհրդին միանալն ավելի շատ անհրաժեշտություն է թվում, քան ընտրություն»,- նշել է լրատվամիջոցը։

Արևմտյան մի պատվիրակ մեջբերել է «Վաշինգտոնի կողմից բարձրացված մաքսատուրքերը, Իրանը, Վենեսուելան, Գազայի հատվածը և Գրենլանդիան»։ Ռուսաստանի նախագահ Վլադիմիր Պուտինը հայտարարել է, որ պատրաստ է Խորհրդին նվիրաբերել սառեցված ռուսական ակտիվներից 1 միլիարդ դոլար։

Որոշ եվրոպացի առաջնորդներ մտահոգված են, որ նախագծի կանոնադրության համաձայն՝ Խաղաղության խորհրդում որոշումների կայացման լիազորությունները կկենտրոնանան Դոնալդ Թրամփի ձեռքում։ Ըստ հրապարակման՝ ԱՄՆ նախագահը, հավանաբար, կկարողանա պահպանել նախագահի իր պաշտոնը ցմահ, քանի որ նա կարող է հրաժարական տալ միայն իր սեփական դիմումի կամ գործադիր կոմիտեի միաձայն քվեարկությամբ: Գործադիր կոմիտեի կազմում, ի թիվս այլոց, կներառվեն ԱՄՆ պետքարտուղար Մարկո Ռուբիոն, ԱՄՆ նախագահի փեսան՝ Ջարեդ Քուշները և Մեծ Բրիտանիայի նախկին վարչապետ Թոնի Բլեերը։

Միաժամանակ, եվրոպացի դիվանագետը անանունության պայմանով Reuters-ին ասել է, որ չնայած ԵՄ երկրները միմյանց հետ կխորհրդակցեն Խաղաղության խորհրդին միանալու վերաբերյալ, վերջնական որոշումը կկայացվի անհատապես՝ կախված նրանց ազգային շահերից։

Reuters-ը հաղորդում է, որ Ֆրանսիայի նախագահ Էմանուել Մակրոնը մտադիր է մերժել հրավերը։ Գերմանիայի կանցլեր Ֆրիդրիխ Մերցը, հունվարի 22-ին Դավոսում ելույթ ունենալով, չի հիշատակել Խաղաղության խորհրդի մասին և նախկինում ազդարարել էր Գերմանիայի հրաժարվելը Թրամփի նախաձեռնությանը մասնակցելուց։ Շվեդիան և Նորվեգիան նույնպես հրաժարվել են միանալ  խորհրդին։

Թարգմանությունը՝ Էմմա Չոբանյանի