02.07.2026 | 16:12
Նախագահ Վահագն Խաչատուրյանը մի շարք օրենքներ է ստորագրել
Պուտինն Աբբասին ասել է, որ Ռուսաստանը պատրաստ է 1 միլիարդ դոլար ուղարկել Խաղաղության խորհրդին
Քաղաքականություն
22.01.2026 | 20:10
Ռուսաստանը պատրաստ է իր սառեցված ակտիվներից 1 միլիարդ դոլար ուղարկել ԱՄՆ նախագահ Դոնալդ Թրամփի կողմից ստեղծվող Խաղաղության խորհրդին։ Այս հարցն արդեն քննարկվել է Վաշինգտոնի ներկայացուցիչների հետ, Պաղեստինի առաջնորդ Մահմուդ Աբբասի հետ հանդիպման ժամանակ հայտարարել է ՌԴ նախագահ Վլադիմիր Պուտինը, գրում է Ինտերֆաքսը։
«Դուք, գուցե, լսել եք, որ մենք պատրաստ ենք մեկ միլիարդ դոլար ներդնել նոր կառույցի՝ Խաղաղության խորհրդի մեջ, առաջին հերթին՝ պաղեստինյան ժողովրդին աջակցելու, այդ միջոցներն օգտագործելու Գազայի հատվածի վերակառուցման և ընդհանրապես Պաղեստինի խնդիրները լուծելու համար։ Ես արդեն ասել եմ, որ նախկին վարչակազմի օրոք Միացյալ Նահանգներում սառեցված միջոցներն օգտագործելով՝ կարծում եմ, որ դա լիովին հնարավոր է։ Նման տարբերակները նախկինում քննարկվել են ամերիկյան վարչակազմի ներկայացուցիչների հետ, և այսօր Մոսկվայում նախատեսվում է այս թեմայով հանդիպում և քննարկում»,- հավելել է Պուտինը։
Խաղաղության խորհուրդն ԱՄՆ նախագահի նախաձեռնությունն է, որը նպատակ ունի լուծել ամբողջ աշխարհում առկա հակամարտությունները՝ սկսած Գազայի հատվածից։ Ակնկալվում է, որ այն կղեկավարի Թրամփը՝ ցմահ։
Ավելի վաղ Վլադիմիր Պուտինն արդեն հայտարարել էր, որ Մոսկվան պատրաստ է 1 միլիարդ դոլար ուղղել ԱՄՆ նախագահի նախաձեռնած Խաղաղության խորհրդին՝ իր մշտական անդամակցությունն ապահովելու համար։
Թարգմանությունը՝ Էմմա Չոբանյանի
