Վախ կա, որ եղբայրը՝ Եզրաս Սրբազանը չի կարող գալ ՀՀ․ եպիսկոպոսը՝ ժողովն Ավստրիայում անցկացնելու մասին

«Չենք մասնակցելու փետրվարի 16-19-ին Ավստրիայի Սանկտ Փյոլթըն քաղաքում նախատեսվող եպիսկոպոսաց ժողովին»,- Factor TV-ի հետ հարցազրույցում ասաց Մասյացոտնի թեմի առաջնորդ Գևորգ եպիսկոպոս Սարոյանը։

Հիշեցնենք՝ հունվարի 19-ին հայտնի դարձավ, որ կաթողիկոս Գարեգին Բ-ի գլխավորությամբ եպիսկոպոսաց ժողովը տեղի կունենա ոչ թե Մայր Աթոռ Սուրբ Էջմիածնում, այլ Ավստրիայում։ Մայր Աթոռի տեղեկատվական համակարգի տնօրեն Տեր Եսայի քահանա Արթենյանի խոսքով՝ նման որոշում են կայացրել՝ «հաշվի առնելով եկեղեցու դեմ սանձազերծած արշավն ու եկեղեցականների նկատմամբ հնարավոր ճնշումները»։

Կաթողիկոսի հրաժարականը պահանջող, «եկեղեցու բարենորոգման» օրակարգի միացած Տեր Գևորգ եպիսկոպոս Սարոյանը, այնինչ, այլ ենթատեքստ է առաջ քաշում. «Ավստրիայում, որովհետև վախ կա, որ իր եղբայրը՝ Եզրաս սրբազանը, չի կարող գալ Հայաստան: Այդ վախը կա»։

Factor TV-ի հարցին՝ եթե Հայաստանում անցկացվեր ժողովը, արդյո՞ք նրանք կմասնակցեին, հոգևորականն ասաց. «Դե, եթե Հայաստանում լիներ, կտեսնեինք արդեն: Հարցերը մենք ենք բարձրացրել, օրակարգը մեզ հետ պետք է համաձայնեցնեն: Հիմա մեզ ժողով են հրավիրում, օրակարգ չկա, ինչի՞ մասին պետք է խոսեն։ Բացի այդ, ժողովի որոշումը կայացվել է ԳՀԽ-ի կողմից, որը, ըստ էության, 2021 թվականից վավեր չէ, որովհետև անդամների մի մասն ընտրվում է, մի մասը՝ նշանակվում: Իսկ 2021 թվականին լրացել է ընտրված անդամների լիազորությունների ժամկետը, և պետք է նոր ընտրություն լիներ, որը չի եղել: Այսինքն՝ արդեն իսկ այս որոշումը վավեր չէ, քանի որ մարմինն ինքը վավեր չէ, պետք է կանոնադրությամբ շարժվեն»։

Մանրամասները՝ տեսանյութում։

Ռոզա Վարդանյան